DILI, 12 novembru 2024 (TATOLI)–Família saudozu no sobrevivente Masakre Santa Krús prefere Governu harii monumentu própriu hodi fó onra no tane a’as eroi sira-nia sakrifísiu ba luta libertasaun nasionál.
Pedidu ne’e hato’o iha ámbitu selebrasaun loron Juventude Nasionál Lorico As’wain ba dala-XXXIII (12 novembru 1991).
Claúdio da Silva nu’udar maun-alin husi saudozu Vitorino Freitas da Silva no Manuel Freitas da Silva, konsidera selebrasaun ne’e importante tebes atu Estadu no Governu bele valoriza no haloot eroi sira ho dignu.
“Importante Governu tenke harii monumentu própriu ida ba Masakre Santa Krús atu ema hotu, liu-liu família sobrevivente inklui komunidade internasionál sira bele vizita no ita mós bele haloot ita-nia saudozu sira-nian ruin. Tanba liuhusi monumentu mak bele dehan onra no tane a’as sira-nian luta ba libertasaun rai no povu ida-ne’e,” Claúdio da Silva, hato’o iha ámbitu selebrasaun loron istóriku ne’s iha rate Santa Krús, tersa ne’e.
Notísia relevante : Sobrevivente 12 Novembru partilla istória Masakre Santa Krús ba alunu sekundáriu sira
Nia haktuir, nia maun-lin ida mak haloot ona ninia ruin maibé ida fali seidauk, tanba ne’e nia husu ba Governu hodi tau matan ba asuntu ne’e.
“Ha’u hakarak rekomenda ba Governu ida-ne’e atu labele baruk no kolen ba restu mortál ne’ebé seidauk hetan, tenke buka hodi haloot iha fatin ne’ebé dignu. Ami família la husu buat barak ba Governu, maibé ami hakarak ami-nia maun na’in-rua ne’e tau iha fatin dignu,” nia akresenta.
Iha parte seluk, Claúdio da Silva sente kontente no triste dala-ida, kontente tanba Estadu no Governu nafatin konsidera martir no joven eroi nia loron, maibé iha mós sentimentu triste tanba lakon maun-alin na’in-rua.
Iha biban hanesan, Jaime da Costa, nu’udar sobrevivente Masakre Santa Krús no saudozu Deonísio da Silva, nia tio rekomenda ba parte Governu atu harii monumentu Masakre Santa Krús ida, nune’e ema hotu ne’ebé mai vizita Timor-Leste inklui jerasaun foun sira bele hatene istória.
“Ha’u hakarak rekomenda de’it ba Governu para labele tuur hakmatek, tenkeser nafatin buka tuir ita-nia sardozu loriku as’wain sira-nia isin ne’ebé mak dodok, ruin naklekar no ran nakfakar iha fatin ida simitériu Santa Krús ida-ne’e, nune’e mós halo monumentu ida dignu hodi bele tau sira hotu-hotu ne’ebé mak mate ne’e nia naran hodi hatudu ba ema hotu, liu-liu nasaun sira ne’ebé mai vizita Timor-Leste bele haree no hatene istoria sira-ne’e,” nia dehan.
Komemorasaun loron nasionál ida-ne’e nu’udar momentu ne’ebé halo sobrevimente ne’e relembra terus sira iha tinan 1991, maibé mós nia orgullu ho juventude sira hotu ninia luta iha tempu ne’ebá.
“Tinan-tinan ita selebra loron nasionál ba ita-nia loriku as’wain sira nia mate, loron ida-ne’e halo ita fuan triste tanba relembra terus sira iha momentu ne’ebá, maibé ne’e sai ona istória ba ita, no ha’u orgullu ho juventude sira hotu ne’ebé luta iha momentu ne’ebá, tanba husi Juventude sira-nia ran ne’ebé nakfakar iha Santa Krús ne’e mak ohin loron goza liberdade ida-ne’e. Sente triste tanba lakon sira maibé mós kontente tanba sira-nia mate ida-ne’e la’ós mate le’et de’it maibé ita hetan ukun rasik-an,” nia tenik.
Nia haktuir, saudozu Deonísio da Silva, nia ruin to’o agora seidauk hetan maibé haloot ona tuir kultura Timor nia.
“Iha momentu ami marsa hamutuk husi Motael to’o Santa Krús ha’u la hetan nia, to’o ohin loron, ami la hetan nia ruin mós, ami husi família so halo tuir de’it husi ita-nia kultura, ami bolu ita-nia katuas sira ne’ebé matan kro’at oituan mai foti fatuk iha fatin Santa Krús ne’e lori bá uma hodi haloot nia rate iha semitériu becusse,” nia katak.
Merlinda Inês da Costa, nu’udar subriña husi sardozu Venâncio Fonseca, husu ba parte Governu atu harii monumentu ida iha Santa Krús, nune’e ema hotu mai vizita simitériu referidu sempre relembra akontesimentu iha loron 12 novembru 1991.
“Nune’e bainhira ema husi fatin seluk mai vizita rate, ema hetan kedas monumentu, entaun ema bele hanoin filafali akontesimentu sira iha momentu ne’ebá, tanba ne’e husu ba parte Governu atu harii monumentu ba saudozu Masakre Santa Krús sira ne’e importante tebes,” nia hato’o.
Maski nune’e, Merlinda Inês da Costa sente triste tanba lakon tio, maibé mós haksolok ho sira-nia mate tanba sira-nia mate ida-ne’e husik hela liberdade ba timor oan hotu no ohin loron ema hotu moris haksolok no livre.
“Ha’u-nia sentimentu ba loron ohin nia ne’e sente triste, tanba lakon ona ha’u-nia tio ne’ebé ami hotu hadomi tebes. Maski triste maibé orgullu tebes ho sira-nia luta ida-ne’e, tanba husi sira-nia luta ne’e mak ohin loron ita goza liberdade,” nia dehan.
Saudozu Venâncio Fonseca, nia ruin daudaun ne’e haloot ona iha simiteriu Lautém.
Jornalista : Osória Marques
Editora : Julia Chatarina
