DILI, 19 novembru 2024 (TATOLI)–Prezidente Komisaun Ezekutiva Banku Nasionál Komersiu Timor-Leste (BNCTL), António Vítor, hateten ajente banku iha suku sira atu fasilita kliente sira foti osan iha suku sira iha área rurál hodi minimiza mós gastu ba iha sukursál BNCTL no fó benefísiu ba iha ajente banku sira hodi dezenvolve negósiu.
Nia esplika, atendimentu tranzasaun osan ba kliente sira-ne’e iha ligasaun ho lamentasun no krítika públiku sira-nian iha rede sosiál.
Atendimentu kliente sira-nian liuhosi ajente banku iha suku ne’e atu kliente sira labele la’o dook no gasta tempu naruk no iha gastu sira seluk ba foti sira-nia osan iha sukursál BNCTL nian iha munisipiu, nune’e mak BNCTL hanoin hodi tau ajente banku iha nivél suku.
“Objetivu husi ajente banku ne’e atu fasilita kliente sira iha área rurál no sira-ne’ebé sai parseiru ajente banku ne’e mós hetan rendimentu adisionál. Tanba, sira negósiu prinsipál tama mak faan sasán. Agora, sira sai hanesan ne’e, sai ajente ema ruma presiza, sira kobra $2,” António Vítor hateten ba jornalista sira liuhosi konferénsia imprensa, iha Timor Plaza.
BNCTL estabelese serbisu ajente banku ne’e mós atu ema hotu asesu serbisu finanseiru ne’ebé besik no baratu iha sentidu kompara ho foti iha ATM ho $0,25 no gasta tempu, distánsia dook no kustu transporte.
“Ema-nia preokupasaun $2 ne’e karun no todan, maibé haluha kustu no tempu ne’ebé lakon,” nia dehan.
Prezidente Komisaun Ezekutiva ne’e hateten, kliente sira ba foti osan iha ajente banku sira iha suku selu de’it $2.
Ajente banku disponbiliza osan ba kliente másimu rihun $1 hodi bele foti iha ne’ebá, importante mak lori sira-nia konta bankaria.
Dadaun ne’e, ajente banku disponivel iha suku 15 iha munisipiu sira hanesan Aileu, Baucau, Bobonaro, Covalima no Lautém.
Jornalista : Jesuína Xavier
Editór : Cancio Ximenes
