Water Aid halo teste ba baktéria Escherichia Coli iha bee laran
DILI, 22 novembru 2024 (TATOLI)–Organzasaun Naun Governamental Water Aid halo teste ba baktéria Escherichia Coli (E. Coli) iha bee laran iha munisipiu Liquiça no Manufahi hodi hatene baktéria ne’ebé kontamina bee husi animál ka ema-nia foer boot.
Jestora Programa Water Aid, Nívia da Cruz, informa, E. coli hanesan baktéria ho gram-negativa ne’ebé kauza infesaun urinaria ka gastroenterite ba sintoma sira hanesan diareia aquosa ka ho raan, moras bainhira ba soe bee-boot.
Nia dehan, sira-nia parte foti ona sampel bee iha munisipiu sira hodi halo teste iha tinan ida-ne’e nia laran.
“Tinan ida-ne’e ami halo teste ba sistema 74 no sistema 6 mak hetan E-coly makaas. Iha sistema 20 iha kutun e-coly maibé naton de’it no restu husi ne sistema sira-ne’e seguru husi kutun e-coli,” Nívia da Cruz hato’o ba Tatoli, nakait ho loron mundial Sintina ho tema “Haris fatin Fatin dame”, iha Caicoli.
Dirijente ne’e mós relata, iha 2018, Water Aid mós halo teste ba 137 sistema, 72% mak iha kutun E. Coli iha Manufahi no Liquiça.
Oinsá atu halo tratamentu ba sistema bee sira-ne’ebé kontamina ho bakteria E. coli, nia hatán, sira servisu hamutuk ho populasaun fó sensibilizasaun no informasaun oinsá hamoos bee sira kontaminadu ne’e.
“Bainhira ita halo teste ona ba iha E. Coli ne’e, nia kutun ne’e mai husi sintina animál sira-nian. iha tratamentu husi saúde maibé ita-nia intervensaun halo operasaun no manutensaun ba sistema bee ne’e, oinsa tau bee matan ho lutu atu animál labele tama ba no bee posu karik taka nia matan no kuda ai-oan sira ba bee-matan sira-ne’ebé kontamina ho baktéria E. Coli,” nia dehan.
Nia esplik,a baktéria E. Coli la perigu liu hanesan kimika maibé ida-ne’e bele hamate ho tratamentu hanesan hamoos de’it.
Jornalista : Jesuína Xavier
Editór : Cancio Ximenes
