DILI, 05 dezembru 2024 (TATOLI)—Membru Parlamentu Nasionál (PN) liuhusi Deputadu FRETILIN, Antoninho Bianco, husu órgaun soberania no servidór Estadu sira iha mákina administrasaun públika ninian atu halo reflesaun iha ámbitu komemorasaun loron internasionál kontra Korrupsaun ne’ebé kada tinan sei komemora iha 09 dezembru, hodi bele serbi povu ho di’ak liután.
“Hanoin loron ne’e selebra iha mundu tomak, iha Timor-Leste mós selebra, maibé loron hanesan ne’e la’ós ita halo selebrasaun ko’alia iha fatin-fatin maibé servodór Estadu sira halo reflesaun, hodi serbi povu ho di’ak liután,” Nia hateten ba jornalista sira iha resintu PN, kinta ne’e.
Tuir nia, liuliu korrupsaun ne’e akontese iha órgaun soberania sira karik uza meiu hanesan rekursu finanseiru no rekursu sira seluk la tuir regra, noo sira-ne’ebé serbi iha instituisaun sira tenke serbi ho di’ak, labele aproveita tempu no aproveita rekursu ne’ebé ema barak nian ba fali interrese privadu no grupu nian.
Hanesan reprezentante povu, nia hato’o ba órgaun soberania sira liuliu membru Governu, membru Deputadu no mós ba servidór sira iha mákina administrasaun públika ninian, liuliu ema ne’ebé serbi Estadu ne’e aproveita halo reflesaun hodi labele komete sasán ne’ebé kontra regra hanesan ema babain dehan lori sasán Estadu nian ba interrese privadu ka grupu.
Aktu korrupsaun ne’e ladi’ak no halo lakon ema seluk nia direitu, nune’e komemorasaun ne’e fó hanoin ba servidór Estadu tomak ho órgaun soberania.
Nune’e mós, ema seluk ne’ebé hetan meiu Estadu nian hanesan emprezáriu sira bele hala’o obra karik tuir regra, tanba dalaruma obra la tuir regra volume serbisu naton osan liu fali, ne’e aktu ida hanesan mós korrupsaun.
Nnune’e, nia hateten, korrupsaun ne’e la’ós akontese iha órgaun soberania no instituisaun Estadu sira maibé bele mós akontese iha empreza privadu sira.
Korrupsaun ne’e afeta ba povu nia moris, korrupsaun ne’e aktu ne’ebé kontra regra balun uza meiu Estadu ne’ebé la tuir dalan, la uza de’it mak ninia sasán ne’ebé nia iha maibé uza fali sasán barak ema seluk nian.
Deputadu KHUNTO, António Verdiál de Sousa, hateten iha 09 dezembru 2024 hanesan loron mundiál Anti-Korrupsaun, ba Timor-Leste buat ida korrupsaun ne’e di’ak-liu timoroan hamutuk kombate korrupsaun.
Atu kombate korrupsaun, nia dehan, presiza timoroan hotu nia boa-vontade no boa fé hodi enkoraja órgaun judisiáriu sira hanesan CAC, PDHJ, Ministériu Públiku, PCIC, Tribunál bele hamutuk hodi identifika dezáfiu ne’ebé mosu iha uzu orsamentu Estadu ba hala’o dezenvolvimentu liuliu iha infraestrutura no osan ba subvensaun partidu.
“Nune’e, husu CNE atu halo kontrolu didi’ak ninia uzu tuir nia dalan ne’ebé iha ona. Tanba, Estadu hakarak minimiza korrupsaun iha nasaun ida presiza ema hotu hamutuk hodi enkoraja órgaun judisiáriu sira,” nia dehan.
Nia husu, atu CAC implementa di’ak liután lei Medida Prevensaun no Kombate Korrupsaun (MPKK) ne’ebé iha lejislatura liu-ba aprova ona hodi halo prevensaun no kombate korrupsaun.
“Lei ne’e mak implementa ho loloos tuir regra vigór, ema barak sei tauk atu halo korrupsaun,” nia hateten.
Membru husi órgaun lejislativu ne’e husu mós ba CAC tau atensaun ba kazu boot sira-ne’ebé durante ne’e sai polémika iha públiku no nia prosesu la’o kle’ur tebes hanesan kazu ró Hakslok ho sira seluk tan.
“Ita haree bainhira CAC nia lideransa hola pose nia promete ona, katak nia sei serbisu independente no imparsiál,” nia dehan
Jornalista : Nelson de Sousa
Editór : Cancio Ximenes
