DILI, 11 dezembru 2024 (TATOLI)—Komisaun F trata asuntu Saúde, Seguransa Sosiál no Igualidade Jéneru iha Parlamentu Nasionál (PN), kuarta ne’e, simu no halo audiénsia ho parte Konsellu Kombatente Libertasaun Nasionál (CCLN, siglá portugés) hodi hato’o preokupasaun liuliu atu halo revizaun ba estatutu hodi hala’o serbisu di’ak liután.
“Ami preokupa uitoan, ita presiza haree hamutuk. Ezemplu, foin daudaun dekretu-lei ba estatutu vetaranu nian CCLN, dekretu-lei númeru 7/2018, 28 marsu, altera fali ba alterasaun daruak ba iha dekretu-lei númeru 33/2024, 18 outubru. Iha ne’e, iha buat balun presiza ami haree hamutuk ho di’ak liután, atu oinsá lori CCLN nu’udar órgaun kompetente ho kualidade ba haree vida no futuru veteranu no kombatente sira-nian iha rai ida-ne’e,” Prezidente Konsellu Fiskál Konsellu Veteranu iha CCLN, Angelo Godinho, hateten ba jornalista sira hafoin ramata halo audíensia audiénsia ho Komisaun F iha sala komisaun F iha PN, kuarta ne’e.
Nia dehan, preokupasaun iha dekretu-lei ne’e presiza hadi’a oinsá atu moderniza no fó di’ak liután kualidade transparánsia no boa-governasaun entermu efikasia no efisiénsia, profisionalizmu ninian.
Dekretu-lei ne’e konsentra liu-ba iha hakarak atu hadi’a konsellu veteranu hodi hala’o serbisu kualidade, maibé iha parte balun presiza haree hamutuk ho di’ak liután, maibé ema hotu sente lei ne’e bele funsiona no lori ema hotu bele hetan objetivu ida di’ak, tan ne’e presiza hadi’a hodi hala’o serbisu di’ak liután.
“Hadi’a katak, ita-boot sira haten,e ohin loron ne’e, sasán hotu-hotu Konsellu Veteranu hanesan mai liu tuir husi dalan ministériu. Ita hakarak, se bele, nia indepedente la’o ninia rasik, hodi nia desizaun rasik no desizaun ne’e mai husi Konsellu Veteranu tomak. Nu’udar indepedente no órgaun ne’ebé kualidade atu haree vida ba jerasaun futuru, liuliu ba oan-ki’ak no faluk sira,” nia hateten.
Tuir nia, iha lei CCLN nu’udar órgaun ne’ebé mak kria podér públiku, autonómia serbisu ne’e independente sein intervensaun husi Governu.
Atu altera estatutu ne’e presiza liuhusi Governu hafoin haruka mai PN nu’udar órgaun lejisladór mak bele hala’o diskusaun no aprovasaun, tan ne’e ekipa konsellu fiskál no konsellu dixiplinár husi CCLN haree ona no presiza tuur hamutuk hadi’a duni.
Nia dehan, durante audiénsia komisaun resposta sei haree didi’ak hafoin sei hala’o fila sorumutu tuir mai hodi ko’alia kestaun refere.
Entretantu, serbisu CCLN durante ne’e ba veteranu sira haree espesífiku liu mak atu haree no fó onra ba sira, prestasaun istória no fó vida di’ak ba jerasaun sira-ne’ebé inan-aman mate ona ka oan ki’ak no faluk.
Tanba ne’e, agora la’o hela, inklui mós halo verifikasaun ba sira-nia realidade luta nia prinsípiu partisipasaun no dedikasaun ba luta naruk independénsia.
Nune’e, programa konsellu nian mak kontinua oinsá mak haree mate-restu no jerasaun husi oan-ki’ak no faluk bele moris di’ak, no ba nasaun ne’e dahuluk prezervasaun istória no daruak Timor-Leste nia indepedénsia ne’e tenke ho kualidade di’ak no soberanu ne’e tenke fó integridade no independénsia ba ema tomak iha nasaun ne’e.
Jornalista : Nelson de Sousa
Editór : Cancio Ximenes
