BOBONARO, 14 dezembru 2024 (TATOLI) – Atleta na’in-64 husi munisípiu Dili, Aileu, Ermera no Bobonaro partisipa kampeonatu Karate Kids tinan 2024 ne’ebé realiza durante loron tolu iha Jináziu Maliana.
Prezidente Komisaun Organizadora, Adriano da Cruz, esplika, kampeonatu ne’e realiza tanba hetan kooperasaun entre Karate Khusinriu nasionál munisípiu Bobonaro ho objetivu atu promove Karate ba jerasaun foun no prepara sira ho responsabilidade.
Notísia relevante: Kampeonatu Nasionál Karate hili atleta kualifikadu hodi partisipa iha eventu internasionál
“Ita hatene katak Karate nu’udar mós arte-marsiál ida, nu’udar atividade desportiva ida atu prepara jerasaun foun sira nia mentál, fíziku liuliu kuida saúde ita-nia oan sira,” nia informa ba Jornalista sira iha Jináziu Maliana.
Nia hatutan, komisaun organizadora prepara ona prémiu hanesan medalla, taxa rotativa inklui osan subsídiu ba atleta sira-ne’ebé sai vensedór hodi dignifika no motiva sira atu kontinua treina nune’e bele hasa’e prestasaun bainhira partisipa iha eventu nasionál no internsionál.
“Ita hatudu prestasaun di’ak sei hamorin ita-nia munisípiu nia naran no mós Timor-Leste nia naran iha mundu,” nia katak.
Biban ne’e, Sekretáriu Autoridade Munisípiu Bobonaro ba Asuntu Sosiál no Organizasaun Komunitária, Júlio Carvalho Caero, agradese ba Federasaun Karatedo tanba liuhusi eventu bele reforsa polítika nasionál ba munisípiu Bobonaro atu hakat ba Kámara Munisípiu.
Caero apela ba atleta sira atu kontinua kompete ho responsabilidade no hatudu esportiva iha jogu.
“Ha’u husu ba alin sira iha kompetisaun ne’e, ambisaun atu hetan medalla ne’e bele mas hatudu esportivita iha kompetisaun laran, buka esperiénsia atu prepara-an ba kompete iha nível nasionál, labele hanoin ha’u simu medalla, tenke primeiru lugar, tanba simu tiha medalla ne’e todan ida ba imi atu mantein nafatin primeiru lugar to’o hotu, ida fali lakon ne’e mós tenke hanoin ha’u tenke treina atubele hamonu fali vensedór ne’e,” nia fó hanoin.
Prezidente Sub-Komisaun Reguladora Arte Marsiál husi Munisípiu Bobonaro, José Ramos, kontente tanba Federasaun Karate bele hamoris fali kampeonatu iha nível munisipál.
Nia dehan, Karate iha Territóriu laran hatudu disiplina no organizadu tuir prinsipiu no filosofia katak atu produz atleta ne’ebé iha prestasaun.
“Ita la rona Karate halo problema iha Timor, Karate Federasaun atletizmu ida ne’e di’ak, hanesan Taekowndo, Kempo, ita haree treinadór sira fokus atu hasa’e prestasaun ba atleta sira, ohin imi halo kompetisaun, la importante imi atu manán ou lakon, importante mak imi koko, imi lakon ohin, imi haka’as-an treinu diak liután, mas imi rende ohin, imi la koko ne’e imi lakon totál,” nia fó hanoin.
Enkuantu Kampeonatu ne’e hahú abertura iha sesta loron 13 no sei remata iha domingu, loron 15 fulan-dezembru.
Notísia relevante: Bartolomeo-Ovidio konfirmadu kompete Shouts East Asian Karate Championship Thailandia
Jornalista: Sérgio da Cruz
Editór: Evaristo Soares Martins