iklan

DESPORTU, HEADLINE

Kampeonatu Nasionál Karate hili atleta kualifikadu hodi partisipa iha eventu internasionál

Kampeonatu Nasionál Karate hili atleta kualifikadu hodi partisipa iha eventu internasionál

Ministru Juventude, Desportu, Arte no Kultura, Nelyo Isaac Sarmento, akompaña husi embaixadór Japaun iha Timor-Leste, Tetsuya Kimura, Prezidente FEKATIL, Filomeno Soares de Araújo, halo abertura ba Kampeonatu Nasionál Karate da-VI Xanana Cup 2024. Imajen Tatoli/ Nelson de Sousa.

DILI, 15 juñu 2024 (TATOLI) – Federasaun Karate-do Timor-Leste (FEKATIL), halo abertura, ohin, ba edisaun da-VI Kampeonatu Nasionál Karate Sénior Xanana Cup 2024 ho objetivu atu hili alteta ne’ebé kualifikadu hodi reprezenta Timor-Leste iha eventu rejionál no internasionál.

Iha abertura ne’e, Ministru Juventude, Desportu, Arte no Kultura (MJDAK), Nelyo Isaac Sarmento, agradese ba federasaun tanba bele realiza eventu ida ne’e, tanba iha tinan oin, Timor-Leste sei hasoru Sea Games, ASEAN no jogu CPLP (Comunidade dos Países de Língua Portuguesa).

“Ne’ebé, tempu ne’e iha atu ita halo beibeik kompetisaun. Alin [atleta] sira, imi hotu-hotu hanoin loron ruma atu defende imi-nia nasaun, tenke sériu iha formasaun no kompetisaun sira ne’e tenke tuir beibeik, nune’e fó oportunidade ba imi partisipa, loron ruma imi bele sai eskolla hanesan selesaun nasionál karate Timor-Leste. Nune’e, dezeju kompete no boa sorte ba imi hotu”, governante ne’e hato’o.

Kampeonatu nasionál ne’e hanesan atividade regulár husi federasaun, maibé durante tinan haat nia laran la organiza kompetisaun ne’e, tanba laiha meiu ruma atu apoia eventu ne’e.

Ba tinan ne’e, Governu Dasiak fó tulun hodi reativa programa ne’e atu halo selesaun ba atleta sira ne’ebé sei reprezenta país iha kompetisaun internasionál. “Ida ne’e atividade husi federasaun no Governu fó apoiu hodi halo selesaun ba atleta nasionál hodi kontinua prepara”, nia realsa.

Nelyo Isaac mós husu federasaun tenke dezenvolve aan hodi halo planu ida ne’ebé adekuadu hodi fó atensaun ba klubu sira atu dezenvolve mós, la’ós atleta de’it.

Nia sujere atu atividade sira hanesan ne’e, treinadór sira mós halo kompetisaun, katak buat ne’ebé sira idaidak fó treinu iha kada klubu nia rezultadu mai husi kompetisaun ne’e.

“Kompetisaun ne’e atu di’ak ka la’e, ne’e depende ba treinadór sira no bainhira sira iha koñesimentu ne’ebé di’ak, sira iha espíritu atu prepara alteta profisionál ba aban bainrua”, nia enkoraja.

Aleinde ne’e, governante ne’e mós ko’alia hela ho embaixadór nipóniku iha Timor-Leste, Tetsuya Kimura, atu realiza festivál ba jogu arte marsiál Japaun nian hanesan karate, ne’ebé sai parte ida atu promove karate iha país.

Prezidente FEKATIL, Filomeno Soares de Araújo, dehan kampeonatu nasionál ne’e federasaun hetan apoiu rihun $17-resin husi MJDAK, ne’ebé kanaliza ba Komisaun Reguladora Arte Marsiál (KRAM).

Eventu ne’e partisipa husi atleta hamutuk 130, kompostu husi mane 65 no feto 65 ne’ebé mai husi munsípiu 12, la inklui Manatuto no Rejiaun Administrativa Espesiál Óe-Cusse Ambeno (RAEOA).

Ba alteta sira ne’ebé sei sai vensedór dahuluk sei simu prémiu monetáriu $200, daruak $150 no datoluk $100, inklui simu sertifikadu. Eventu ne’e hala’o durante loron rua, entre 15 no 16 Jullu.

Jornalista: Nelson de Sousa

Editora: Maria Auxiliadora

iklan
iklan

Leave a Reply

iklan
error: Content is protected !!