DILI, 29 dezembru 2024 (TATOLI)- Tribunál Primeira Instánsia Dili, domingu ohin, halo Interrogatóriu dahuluk ba arguidu na’in-21 ne’ebé molok ne’e envolve iha krime danu ho violénsia iha suku Bebonuk no obstrusaun autoridade ne’ebé akontese iha Taibese, suku Nain Feto, Munisípiu Dili, durante selebrasaun natál.
Iha prosesu interrogatóriu dahuluk ne’e, Ministériu Públiku promove arguidu sira ho krime danu ho violénsia ne’ebé previstu iha artigu 260 no krime omesidu tentadu ne’ebé previstu iha artigu 138 husi Kodigu Penál Timor-Leste.
Defeza husi arguidu na’in-21, Advogadu Privadu Cancio Freitas, hateten, interrogatóriu dahuluk ne’e nu’udar faze ne’ebé ko’alia kona-ba medida koasaun tanba Tribunál hasai despaixu deside aplika medida koasaun Aprezentasaun Periódika ba arguidu na’in tolu, inklui arguidu na’in-18 seluk Tribunál aplika Termu Identidade Rezidénsia .
“Kazu Bebonuk, Ministériu Públiku promove ho krime Dano e Violência no kazu Taibesi Ministériu Públiku promove ho krime omesido tentadu. Maibé, depois liuhusi interrogatóriu dahuluk ne’e Tribunál aplika medida koasaun aprezentasaun ba arguidu na’in tolu, restu hetan TIR,” Cancio Freitas ba TATOLI via whatsApp, domingu ohin.
Nia dehan, razaun Tribunál aplika medida koasaun hirak ne’e tanba kazu ne’e foin mak iha prosesu primeiru interrogatóriu, tanba ne’e presiza aplika de’it medida koasaun.
“Kona-ba krime iha ka laiha ne’e iha prosesu ordináriu mak ko’alia. Enkuantu, agora faze ko’alia kona-ba medida koasaun no desizaun ida-ne’e justu no adekuadu,” nia adianta.
Notísia relevante:PNTL detein suspeitu na’in-21 durante selebrasaun Natál
Jornalista: Natalino Costa
Editór: Rafael Ximenes de A. Belo
