DILI, 09 janeiru 2025 (TATOLI)–Governu liuhusi Fundu Dezenvolvimentu Kapitál Umanu (FDCH, sigla portugés) despede tan bolseiru na’in-22 hodi tuir formasaun iha área judisiária iha Portugal.
“Agora ne’e bolseiru iha na’in-24 mak tuir formasaun iha Portugal maibé na’in-22 mak bá iha loron 27 no 28 dezembru 2024. Sira bá halo prátika iha ne’ebá durante fulan-neen, na’in-rua seluk seidauk arranka tanba problema privada hanesan tuur ahi hela, bainhira loos ona mak sei tuir bá,” Diretór Ezekutivu FDCH, Júlio Aparício, informa ba Agência Tatoli, iha ninia knaar fatin, Colmera, kinta ne’e.
Notísia relevante : Reforsa setór justisa presiza aumenta rekursu umanu-formasaun espesializada
Sira bá hasai kursu Majistradu Judisiáriu, Ministériu Públiku no Defensór Públiku hamutuk na’in-24 , ne’ebé sei ba kontinua formasaun iha faze prátika durante fulan-neen iha Portugal.
“Formasaun ne’e kada tinan ita prevee rihun $500 hodi selu ba formandu sira-ne’ebé tuir formasaun durante iha Portugal. Kona-ba formadór ita mak selu hodi hanorin formandu sira-ne’e. Ida-ne’e programa Ministériu Justisa ne’ebé liga ho reforma justisa,” nia akresenta.
Atividade formasaun ba formandu sira finansia husi FDCH nia orsamentu liuhusi programa formasaun, tanba ne’e instituisaun Estadu ne’e iha kompromisu maka’as hodi apoiu formasaun sira iha setór judisiáriu hodi prepara rekursu umanu kualifikadu hodi kontribui ba programa IX Governu nian iha setór reforma justisa.
Jornalista : Osória Marques
Editora : Julia Chatarina