DILI, 16 Janeiru 2025 (TATOLI) – Koordenadór timoroan ba projetu CAFE, Rojer Rafael Soares, hateten, Eskola CAFE sei mantein kualidade iha prosesu ensinu, maske espasu limitadu, maibé estudante sira nafatin okupa klasifikasaun iha ezame nasionál.
“CAFE sira iha munisípiu sempre okupa 1⁰ no 2⁰ lugar iha ezame nasionál. Ne’e signifika katak lian portugés ne’e promove maka’as liu iha eskola CAFE no profesór barak mak aprende lian portugés iha eskola CAFE sira, kompara ho fatin seluk tanba profesór malae ho Timor sempre komunika malu hela de’it. Ne’e ha’u hanoin forma ida ne’ebé ita bele promove ka divulga lian portugés iha ita-nia rain. No ida-ne’e ita sei mantein kualidade nune’e ba futuru eskola CAFE mantein okupa klasifikasaun iha ezame nasionál”, Kordenador Rojer Rafael Soares, dehan iha knaar fatin, Villa-Verde, kuarta ne’e
Soares dehan, eskola CAFE iha Dili, ho númeru estudante tinan-tinan aumenta, entaun estabelesimentu ne’e la to’o, partikularmente iha saladeaula.
“Entaun ita uza fali eskola públiku sira ne’ebé mak iha espasu ne’e hodi ita uza ba prosessu aprendizajen”, nia dehan.
Nia esplika, objetivu fundamentál ida husi eskola CAFE ne’e mak atu promove lian portugés, se kompara nivel língua aprendizajen ba língua portugés, eskola CAFE ho eskola seluk, CAFE avansadu uitoan. Avansadu tanba prosesu aprendizajen ne’e ho lian portugés, profesór sira ne’ebé hanorin labarik sira ne’e mós obrigatóriu tenke ko’alia lian portugés.
“Nivel divulgasaun lian portugés ne’e iha CAFE intensiva liu, maka’as liu tanba atividade extra kurikulér barak mak, hanesan poezia, leitura, promove lian portugés, atividade sira seluk hanesan liga ho literatura buat sira ne’e, sira ne’e mak sempre promove lian portugés no halo labarik sira hatene ko’alia lian portugés no bele komprende lian portugés. Labarik sira ita hasoru sira ko’alia portugés sira ko’alia portugés”, nia hateten.
Eskola Sekundáriu CAFE Lautém no EBC Maliana Sai Primeiru Klasifikadu iha Ezame Nasionál. Segundu Klasifikasaun hosi Eskola CAFE Ensinu Superiór jerál Aileu no Ensinu Báziku Sentrál Dili, no terseiru klasifikasaun hosi Ensinu Sekundáriu Jerál Santo Inacio Loiola no Ensinu Báziku Sentrál CAFE Ainaro. Purtantu daudaun ne’e profesór timoroan hamutuk 347 ne’ebé mak hanorin iha eskola CAFE, iha territóriu no 150 profesór portugés
Tuir dadus, totál alunu finalista iha tinan letivu 2024, hamutuk 55.661, kompostu husi Ensinu Báziku hamutuk 28.216, Ensinu Sekundáriu Jerál hamutuk 23.661, Ensinu Sekundáriu Tékniku Vokasionál hamutuk 3.733 no Ensinu Rekorrente hamutuk 364.
Husi totál estudante iha leten, estudante Ensinu Báziku ne’ebé la tuir ezame nasionál hamutuk 262, Ensinu Sekundáriu Jerál hamutuk 339, Ensinu Sekundáriu Tékniku Vokasionál hamutuk 51 no Ensinu Rekorrente hamutuk 27.
Jornalista : Osória Marques
Editór : Zezito Silva