iklan

JUSTISA, HEADLINE

CAC sei investiga lista veteranu ne’ebé MACLN publika 

CAC sei investiga lista veteranu ne’ebé MACLN publika 

Komisáriu Komisaun Antí Korrupasaun (CAC, sigla portugés), Rui Pereira dos Santos, hamutuk ho nia estrutura no investigadór sira halo konferénsia imprensa liga ho lista veteranu ne’ebé Governu publika iha semana ne’e, ne’ebé hamosu polémika. Foto TATOLI/Natalino Costa

DILI, 17 janeiru 2025 (TATOLI)—Komisáriu Komisaun Antí Korrupsaun (CAC-sigla portugés), Rui Pereira dos Santos, hateten ekipa CAC sei investiga lista veteranu hamutuk rihun 90 ne’ebé Ministériu Asuntu Kombatente Libertasaun Nasionál (MACLN) publika ona iha kuarta (15/01/2025).

Tuir nia, lista hamosu dúvida no preukupasaun iha públiku tanba lista ne’ebé fó sai husi Governu ema tinan ki’ik bele sai veteranu, tanba ne’e CAC tenke halo intervensaun atu investiga  no verifika dokumentu sira hodi hatene loloos iha duni veteranu falsu iha prosesu verifikasaun dadus ka lae.

“Ita la halo impedimentu ba imi-nia direitu ba pensaun maibé imi akompaña hotu sira ne’ebé tinan sanulu resin rua mai kraik ne’e veteranu hotu. Ne’e mak ita hotu preukupa ne’e,” Komisáriu Rui hateten ba jornalista sira liuhusi konferénsia imprensa ne’ebé hala’o iha edifísiu CAC, Farol, sesta ne’e.

Notísia relevante: OJE 2025: MACLN prevee millaun $207 selu veteranu rejistadu 2009

Nia esplika, bazeia ba lista ne’e, sira ne’ebé moris iha 1975  mai to’o 1985 no 1986 iha ai-laran ne’e  sei dehan merese, atu dehan iha direitu ba pensaun. Maibé, sira ne’ebé moris iha 1989 mai leten mak veteranu hotu ne’e, mosu preukupasaun.

Tanba ne’e, Rui tenik, CAC halo intervensaun para veteranu sira ne’ebé mak merese atu simu sira-nia direitu ne’e merese simu duni, maibé veteranu falsu sira-ne’e tenke hapara.

“Sira ne’ebé mak falsifika dokumentu ne’e mós ita presiza halo investigasaun, nune’e ita-nia osan Estadu ne’e la monu leet de’it, tan de’it osan,” nia hatutan.

Notísia relevante: CMCLN Baucau simu reklamasaun kombatente hamutuk 9.900 resin

Komisáriu CAC ne’e informa, CAC sei husu pedidu ofisiál ba Ministru Asuntu Veteranu Kombatente Libertasaun Nasionál atu fornese dadus ba CAC nune’e CAC nia ekipa bainhira tún ba terenu halo verifikasaun ba dadus sira ne’ebé Governu fó sai ona ne’e dadus ne’e bele fortifika CAC nia servisu ba investigasaun nian.

Nia sujere ba Governu, bazeia ba publikasaun lista veternu ba sira ne’ebé moris iha 1985 ba to’o 1990 ne’e, di’akliu provizoriamente Governu hasai tiha husi lista lai.

Lista veteranu dezde publikadu ne’e iha preukupasaun lubun-boot husi públiku no veteranu sira rasik, tanba liga ba partisipasaun funu ne’e iha mós tinan ki’ik sai veteranu hotu.

Jornalista: Natalino Costa

Editór: Xisto Freitas da Piedade

 

 

 

 

 

iklan
iklan

Leave a Reply

iklan
error: Content is protected !!