iklan

EDUKASAUN

CCF omenajeia no fó rekoñesementu ba Komandante Olocassa 

CCF omenajeia no fó rekoñesementu ba Komandante Olocassa 

Imajen: Osoria Marques

DILI, 17 Janeiru 2025 (TATOLI) – Komité Sentrál FRETILIN (CCF, sigla portugés) presta omenajen no rekoñesementu boot ba Komandante Lino da Costa “Olocassa” nia dedikasaun no kontribuisaun luta ba libertasaun Independénsia Timor-Leste.

“Ha’u lori Komité Sentrál FRETILIN nia naran no lideransa tomak nia naran presta omenajen no rekoñesementu boot tebetebes ba ita-nia komandante Lino da Costa “Olocassa”. Obrigadu Lino ba ó nia sakrifisiu boot ida-ne’e. Obrigadu tanba bele husik legadu ida-ne’e ba ami hotu para kontinua hakat ba oin, nune’e fó forsa no kbiit nafatin ba oan ho beioan no FRETILIN. Partikularmente ha’u “Lú Olo” hamriik iha ne’e sai testamentu ne’ebé to’o ita rua fahe-malu, lakon de’it”, Prezidente Komité Sentrál FRETILIN, Francisco Guterres”Lú Olo “, hatete iha Sede FRETILIN, Comoro, Dili, sesta ne’e.

Tuir Lú Olo, dedikasaun no kontribuisaun luta ba libertasaun Independénsia Timor-Leste Olocassa nian, ohin loron povu no rai doben ida-ne’e hetan Liberdade no hakmatek.

“Agradese ba Komandante Olocassa no família nia kontribuisaun luta hodi sosa liberdade no independénsia nune’e ohin ita iha. Nune’e komandante Olocassa iha sektor ponta leste nian. Ne’ebé nia luta to’o últimu ba nia vida tomak. Nu’udar komandante rejiaun ponta leste nian la’ós distingi de’it hanesan militár maibé mós militante FRETILIN nian ne’ebé kaer kilat iha liman hodi defende nu’udar liman-kroat FRETILIN nian, defende kauza Timor-Leste ninian no kauza povu maubere nian”, haktuir Lú Olo.

Antigu Prezidente Repúblika, dehan Komandante Olocassa husik hela nia determinasaun no korajen ba nia povu, nia rain, maubere tomak. Se sakrifísiu boot ne’ebé komandante Olocassa husik hela ba família oan no beioan sira, hanesan legadu ida ba imi.

“Entaun ha’u bele dehan tinan 40-resin ne’ebé ita fó omenajen ida ba nia, fó onra no glória ba nia. Nune’e ita orgullu ba nia. Hanesan partidu FRETILIN hamutuk Sekretáriu Jerál FRETILIN estrutura tomak ami hahí, no hanai nafatin nia. Hodi halo kompromisu ida-ne’ebé mak sira mate uluk nia halo, hodi entrega fila-fali mai FRETILIN para luta nafatin iha segunda faze. Ne’ebé luta ba libertasaun povu nian”, Dehan Lú Olo.

Família Saudozu Komandante Lino Olocassa, Mariano Monteiro da Costa, agradese no apresia ba  Governu Konstitusionál ne’ebé koopera tebes hodi ohin loron bele idenfika no haloot restu mortál ne’e ho dignu iha jardin eroi Metinaro.

“Ami lahaluha, husu obrigada no apresia ba IX Governu liuliu F-FDTL no PNTL ne’ebé koopera di’ak tebes hodi hala’o nia prosesu investigasaun nune’e ohin loron ita hetan rezultadu ne’ebé di’ak. Depois planu Governu sei haloot iha jardin dos eroi. Depois família sei halo tuir kultura iha nia lisan ne’ebé iha. Nune’e atu dehan ha’u-nia sentimentu triste no kontente hamutuk, maibé ha’u triste tanba kleur demais liu, ami hein ami-nia maun nia ruin tinan 40-resin, no ita hetan no konsege identifika nia ruin, ohin ita bele rai nia ruin nu’udar eroi ne’ebé dignu”, nia konklui.

Jornalista: Osória Marques

Editór : Zezito Silva

 

iklan
iklan

Leave a Reply

iklan
error: Content is protected !!