Taur inaugura International School Azevedo Marçal iha Metinaro
DILI, 20 janeiru 2025 (TATOLI)—Antigu Prezidente Repúblika no Primeiru-Ministru, Jenerál Taur Matan Ruak, segunda ne’e, inaugura International School Azevedo Marçal (ISAM) iha Metinaro.
Notísia Relevante: PM Taur inaugura eskola TEKVOK Maria Regina Guterres Metinaro
“Agradese boot ba Dr. Azevedo ne’ebé hola inisiativa di’ak hodi harii eskola ida ho kualidade internasionál iha ne’e. Agradese mós ba doadór sira-ne’ebé fó apoia másimu harii eskola ne’e. Agradese ba Embaixadora Australia iha Timor-Leste, soe nia tempu hodi mai inaugura eskola internasionál ida-ne’e,” Taur hateten iha nia intervensaun.
Antigu Prezidente Repúblika ne’e apresia fundadór Dr. Azevedo Marçal tanba halo mudansa boot iha eskola ne’e, liuliu iha infrastrutura ne’ebé komesa sufisiente ba estudante sira atu aprende.
“Apresia tebes ba fundadór, tanba eskola ne’e iha tinan hira ba kotuk harii ha’u mai haree, uma foin mak ida de’it, saladeaula sira fahe, balun sai dormitóriu ba ita-nia oan sira hodi toba, balun ba ita-nia oan sira atu eskola, maibé agora iha mudansa makaas. Tanke la’o nafatin ba oin,” Taur hateten.
Nune’e, nia enkoraja fundadór no profesór sira-ne’ebé hanorin iha eskola ne’e kontinua hanorin estudante sira ho kualidade hodi prepara futuru nasaun nian, tenke hakat ba oin ho kondisaun ne’ebé agora iha.
“Ita lalika hein buat hotu kompletu mak ita hahú. Hahú kaer moris ho ita-nia oan sira dala ida, oan sira boot, sira matenek eskola mós luan,” nia dehan.
Nia mós husu ba profesór sira atu hanorin estudante sira ho di’ak, atu nune’e labele lakon inan-aman sira-nia konfiansa tanba hanorin estudante ho di’ak mak bele tane inan-aman sira-nia konfiansa.
Fundadór International School Azevedo Marçal (ISAM), QAzevedo Marcal, hateten inaugurasaun ba eskola ISAM ne’e importante tebes hodi prepara estudante sira ho kualidade ba futuru.
“Ohin, ita inaugura eskola ISAM, eskola internasionál ida-ne’ebé ita integra hamutuk iha eskola Koléjiu Maria Regina Guterres. Iha tinan rua ba kotuk, ita halo inaugurasaun ba eskola Koléjiu Maria Regina Guterres ne’ebé hahú ho estudante husi eskola Primaria, Pre-Sekundária no Sekundária, agora ita iha tan eskola internasionál ida-ne’e ba de’it Primaria no Pre-Sekundaria. Ba oin, ita bele loke mós to’o sekundária,” Azevedo hateten.
Nia dehan, eskola internasionál ida-ne’e sei la’o ho versaun inglés hotu no sira-nia estudu hanesan mós ho eskola Kolejiu Maria Regina Guterres nian mak sira hela iha kolégiu no eskola iha fatin ne’e.
Harii ISAM ne’e atu prepara estudante sira bele kompete iha nivel nasionál, rejionál no internasionál, tanba tenke prepara estudante sira-ne’ebé ko’alia inglés ho di’ak atu nune’e aban bainrua Timor-Leste tama ASEAN karik Timor-Leste nia rekursu preparadu.
Nia hatutan, prosesu eskola iha ISAM sei hahú aban ba oin ho totál estudante na’in-15 iha faze primeiru iha nivel primaria no pre-sekundária.
Tuir dadus ne’ebé iha, estudante husi ISAM no Kolejiu Maria Rezina Guterres daudaun ne’e hamutuk 250 no husi númeru ne’ebé iha hahú husi pre-eskolár to’o Sekundáriu, no estudante maioria hela iha dormitóriu ne’ebé eskola prepara no balun fila ba uma ne’e ba sira-ne’ebé sira-nai uma besik eskola ne’e.
“Agora daudaun ne’e, profesór sira ita foti hosi rai-laran. Ba oin, iha nesesidade, ita bele rekruta husi rai-li’ur maibé agora ita mós iha voluntáriu internasionál balun iha ne’e. Totál profesór ba eskola rua ne’e hamutuk 20-resin, ISAM profesór na’in-hitu,” nia dehan.
Nia subliña, bainhira iha futuru estudante númeru aumenta mak eskola sei halo rekrutamentu ba profesór ne’ebé ho kualidade di’ak atu hanorin iha eskola rua ne’e.
“ISAM ita foin la’o, maibé durante ne’e ita iha doadór lubuk ida mak fó apoiu mai ita. Iha rai-laran, ita-nia Governu sira apoiu osan uitoan, apoiu fasilidade hanesan meza, kadeira, livru. Ita mós iha parseiru privadu balun apoiu hanesan Telemor apoiu komputadór, Embaixada Xina apoiu komputadór, Embaixada Austrália mós apoiu hela ita iha materiál hanesan ATK. Ba oin, ita mós elabora hela kuríkulu Austrália nian iha eskola ISAM fiar katak ba oin sira sei apoiu ita ho másimu liu,” nia dehan.
Daudaun ne’e, eskola ne’e iha saladeaula hamutuk 15 ne’ebé utiliza mós balun ba dormitóriu no oras eskola fahe ba parte dadeer no lorokraik.
Embaixadóra Austrália iha Timor-Leste, Caitlin Wolson, espresa nia nia sentimentu kontente hodi partisipa iha serimónia inaugurasaun International Eshool Azevedo Marcal (ISAM) ne’e.
“Ha’u sente kontente bele marka prejensa iha ne’e, Austrália nafatin apoiu Timor-Leste iha setór edukadsun. Ha’u kontente mós bainhira eskola ida-ne’e atu adapta ba kuríkulu Austrália nian, ida ne’e di’ak tenbes. Ami nafatin apoiu ita-boot sira,” Embaixadóra ne’e hateten.
Jornalista : Hortencio Sanchez
Editór : Cancio Ximenes
