OÉ-CUSSE, 21 Janeiru 2025 (TATOLI) – Hahú janeiru 2024 to’o janeiru 2025, Serbisu Saúde iha Rejiaun Administrativa Espesiál Oé-Cusse Ambeno (RAEOA) rejista pasiente na’in-81 ne’ebé sofre moras HIV-SIDA (Acquired Immune Deficiency Syndrome).
“Kazu HIV-SIDA to’o Janeiru 2025 rejista ona pasiente na’in-81 iha feto no mane. Pasiente sira kontinua hetan kontrola husi pesoál saúde. Kazu 81 ne’e detetadu iha fasilidade saúde sira, tantu iha Ospitál Referál, sentru saúde no postu saúde sira, maibé balun seidauk rejista, sei kontinua la’o la’o livre,” Sekretáriu Rejionál ba Asuntu Saúde, Luís de Jesus Neno, informa iha avaliasaun progresu servisu atinjementu indikadór save setór saúde iha Oé-Cusse, ohin.
Notísia relevante:Estrela+ disemina impaktu HIV-AIDS iha Pante Makassar
Kazu 81 ne’e rekolla liuhusi ezaminasaun bainhira profisionál saúde sira halo screening masal liuliu hasai raan iha fasilidade saúde hanesan iha postu saúde, sentru saúde no Ospitál Referál Oé-Cusse.
“Meiu deteta kazu sira-ne’e, bainhira pasiente mai iha fasilidade saúde, pasiente hasai raan, hafoin ba teste iha laboratoriu mak foin hatene nia rezultadu. Ne’ebé ita dadús ne’e sa’e, uluk 20, iha 2024 to’o Outubru rejista 78 maibé agora sa’e to’o 81,” nia dehan.
Atu solusiona kazu sira-ne’e, Sekretáriu Rejionál ba Asuntu Saúde dehan sei kontinua implementa programa promosaun saúde iha nivél suku no aldeia sira, atu konsiénsializa sidadaun hotu hodi kuidadu aan liuhusi hasai raan no labele halo relasaun arbiru.
Antes ne’e, Autoridade RAEOA realiza enkontru koordenasaun ho servisu saúde provinsia Nusa Tenggara Timur (NTT) atu servisu hamutuk foku liu ba moras hada’et sira.
“Ita-bele hatene ita-nia dadús, ezemplu Oé-Cusse kazu 81, maibé iha pasiente balu derepente lakon iha ne’e ba mosu iha NTT, entaun servisu saúde iha TTU bele hatene. Karik husi NTT iha kazu HIV-SIDA derepente mai vizita iha Timor-Leste liuliu Oé-Cusse ita bele simu hodi atende,” nia dehan.
relembra katak, iha fulan Jullu tinan kotuk, Institutu Nasionál Kombate VIH/SIDA , Institutu Públik (INCSIDA,I.P) hala’o ona sosializasuan iha sub-rejiaun Pante Makasar, nune’e iha futuru sei kontinua ba sub-rejiaun seluk, atu hamutuk prevene-aan tanba moras ne’e hada’et liuhusi relasaun seksuál livre.
Dadús rejistadu iha servisu saúde Oé-Cusse, dezde 2013 to’o Dezembru 2022 kuaze ema na’in 10-resin mak hakotu ona vida ho moras HIV-SIDA.
Notísia relevante:INCSIDA husu estudante sira iha Oé-Cusse prevene moras hosi HIV-SIDA
Jornalista: Abílio Elo Nini
Editór: Florencio Miranda Ximenes
