iklan

HEADLINE, POLÍTIKA

Bankada Governu no opozisaun espresa vontade alterasaun lei Pensaun Vitalísia

Bankada Governu no opozisaun espresa vontade alterasaun lei Pensaun Vitalísia

Edifísiu Parlamentu Nasionál. Imajen Tatoli/António Gonçalves

DILI, 22 janeiru 2025 (TATOLI)–Bankada opozisaun husi Partidu Libertasaun Populár (PLP) iha Parlamentu Nasionál (PN) prontu fó apoiu bainhira iha inisiativa ba alterasaun lei Pensaun Vitalísia.

“Ami númeru 1, sei fó apoiu kedas. Ami-nia kompromisu desde uluk kedas, Pensaun Vitalísia ne’e ita tenke halo alterasaun liuliu buka atu integra ho lei ida kona-ba Seguransa Sosiál, ne’ebé lei ida-ne’e bele junta fali ho lei Pensaun Vitalísia, karik bele ko’a Deputadu sira-nia saláriu depois to’o idade reforma mak foin rekezita ita-nia direitu husi seguransa sosiál, nomós Pensaun Vitalísia ne’ebé ita mak ko’a no kontribui, labele tau todan fali ba Estadu liuhusi Orsamentu Jerál Estadu (OJE),” Xefe Bankada PLP, Maria Angelina Sarmento, deklara iha resintu PN, kuarta ne’e.

Nia dehan, hafoin tinan-lima Deputadu sira la re-eleitu, ne’ebé mak idade produtivu hela labele hetan lai, maibé agora Pensaun vitalísia hafoin tinan-lima Deputadu no membru Governu sai ida-ne’e iha kedas.

Notísia relevante : FRETILIN-PD prontu apoia inisiativa altera lei Pensaun Vitalísia, CNRT prioriza

Deputada ne’e haktuir, iha VIII Governu lei ne’e iha inisiativa husi Ministériu Solidariedade Sosiál no Inkluzaun (MSSI) lori mai aprezenta iha PN maibé Deputadu sira la aprova.

“Atu dehan, ida afavór PLP mesak iha VIII Governu ne’ebé Vise-Ministra MSSI lori ezbosu alterasaun lei Pensaun Vitalísia ba titulár órgaun soberania sira, seidauk to’o votasaun, maibé iha de’it diskusaun nia laran ami nota momos kuaze bankada hotu la aseita ho alterasaun lei Pensaun Vitalísia hodi integra hamutuk iha rejime kontributivu seguransa sosiál, entaun diskusaun paradu tiha no ami la konsege iha kompromisu ida iha Parlamentu,” nia konta tuir.

Deputada ne’e hatuta: “ida-ne’e hatudu PLP iha duni vontade atu altera lei Pensaun Vitalísia no integra iha rejime kontributivu seguransa sosiál. Maibé iha Parlamentu hanesan ita hatene lei ida atu pasa tenke iha votu 33 no momentu ne’eba PLP iha kadeira ualu de’it, mezmu momentu ne’ebá iha plataforma nia laran nu’udar bankada Governu.”

Tanba ne’e, iha lejizlatura ne’e bainhira iha inisiativa altera lei Pensaun Vitalísia, Bankada PLP nu’udar bankada opozisaun prontu fó apoiu.

PD no CNRT submete

Bankada Governu husi Partidu Demokrátiku (PD) no Congresso Nacional da Reconstrução Timorense (CNRT) submete bainhira iha inisiativa ruma aprezenta alterasaun lei Pensaun Vitalísia.

Iha fatin hanesan, Xefe bankada PD, Manuel Noronha, hateten, Bankada Governu submete no prontu kolabora bainhira iha inisiativa ruma.

Tuir Nia, atu altera ka halakon ne’e depende ba konsensu entre bankada parlamentár liuliu bankada boot rua hanesan CNRT no FRETILIN.

“Hanesan polítiku atu hatete ami-nia votu oituan, ne’ebé ami labele hola desizaun, kona-ba Pensaun Vitalísia ida-ne’e la’ós agora mak ita ko’alia, durante tinan naruk ami hateten halakon, maibé desizaun iha plenária, ami bankada kiik ne’ebé ami haree ba desizaun tuir rezultadu ne’ebé iha. Depende ba konsensu iha Parlamentu no depende ba maioria iha tanba iha bankada rua hanesan CNRT ho FRETILIN. PD hanesan Bankada Governu, ami submete ba desizaun ne’ebé mak iha,” nia hato’o.

Notísia relevante : Bankada KHUNTO apoiu alterasaun lei Pensaun Vitalísia

Nune’e mós, Vise Bankada CNRT, Patronício dos Reis Fernandes, komenta ho liafuan badak katak, bainhira iha inisiativa mak sei fó segimentu hodi halo diskusaun.

“Inisiativa lei ne’e bele Deputadu no bele husi Governu, ne’ebé bainhira iha inisiativa ruma tama mai mak baixa ba ami -ia komisaun mak komisaun adianta avansa,” Prezidente Komisaun A trata asuntu Justisa no Konstituisionál ne’e hato’o.

Antes nee’e, Prezidente Parlamentu Nasionál Maria Fernanda Lay, fó sai katak, iha tinan ne’e sei fó prioridade ba diskusaun lei lima inklui alterasaun Pensaun Vitalísia.

Jornalista     : Nelson de Sousa

Editora          : Julia Chatarina

iklan
iklan

Leave a Reply

iklan
error: Content is protected !!