VIQUEQUE, 23 janeiru 2025 (TATOLI)—Xefe suku Ahic, postu administrativu Lacluta, munisípiu Viqueque, Ercilio Soares, informa Banku Nasionál Komérsiu Timor-Leste (BNCTL, sigla portugés) no Institutu Nasionál Seguransa Sosiál (INSS) hala’o tiha ona pagamentu ba idozu hamutuk 247 iha suku Ahic, maibé idozu na’in-ida (1) mak ninia dokumentu kartaun eleitorál no konta bankária lakon, nune’e nia sei ba trata fali hafoin banku halo pagamentu.
“Pagamentu idozu ba faze dahaat, BNCTL no INSS husi suku Ahic tersa (21/01) horisehik no ami-nia idozu sira simu ona sira-nia diretu subsídiu. Kona-ba prosesu pagamentu iha suku Ahic la’o di’ak to’o pagamentu ramata,” Ercilio Soares hateten ba Agência TATOLI, iha postu Lacluta, ohin.
Nia dehan, oráriu pagamentu ba postu Lacluta nian hahú iha 20-22 janeiru 2025, no prosesu pagamentu ba idozu sira konklui tiha ona.
Ba pagamentu faze dahaat ne’e, autoridade Ahic hato’o agradesimentu ba BNCTL no INSS tanba fó oportunidade ba autoridade hodi halo deklarasaun ba ferik-katuas no ema ho defisiénsia sira (AhD) ne’ebé moras no la’o labele ne’e, banku bele mai selu direta iha sira-nia hela fatin.
“Ha’u hato’o agradesimentu ba BNCTL no INSS, ba pagamentu iha faze dahaat (IV) ne’ebé fó oportunidade ba ami hodi halo deklarasaun ba ita-nia idozu sira-ne’ebé la’o labele no hatama lista idozu ba banku, depois sira mai selu direta. Tanba pagamentu sira uluk ne’e, kuandu idozu sira la simu, na’in rasik mak tenke ba banku Viqueque mak foin simu sira-nia subsídiu, ne’ebé sai difikuldade ba ita-nia idozu sira,” nia dehan.
Tanba ne’e, ba oin, nia husu ba BNCTL no INSS nafatin halo pagamentu ba idozu sira-ne’ebé la’o labele hodi simu sira-nia direitu ne’e iha sira-nia uma, atu nune’e sira labele la’o dook.
Iha fatin seluk, Diretór Sentru Solidaridade Sosiál no Inkluzaun munisípiu Viqueque, Geraldo de Carbalho, haktuir pagamentu ba idozu sira iha munisípiu Viqueque daudaun ne’e BNCTL no INSS hala’o hela.
“Pagamentu ba faze dahaat Viqueque nian, tuir oráriu postu Lacluta ita hahú segunda ne’e, ne’ebé hotu ona. Daudaun ne’e, ekipa pagamentu sira kontinua halo pagamentu ba ita-nia idozu sira iha postu Uatucarbau ne’ebé hahú husi horisehik to’o aban ne’e ramata ona. Depois, sei kontinua pagamentu iha postu Ossú to’o 30 janeiru,” nia dehan.
Tuir kalendáriu, nia informa, ba idozu sira iha postu administrativu Viqueque Vila ne’e sei simu iha 31 janeiru to’o 05 fevereiru 2025, no iha 06 fevereiru ne’e sei hala’o pagamentu ba idozu sira iha postu administrativu Uatulari.
Tuir dadús husi BNCTL, idozu sira iha munisípiu Viqueque ho totál benifísiariu hamutuk ema na’in-8.423 husi suku 36 no durasaun paga durante loron 17 nia laran.
Jornalista : Vitorino Lopes da Costa
Editór : Cancio Ximenes