BOBONARO, 31 janeiru 2025 (TATOLI)—Natar-na’in iha suku Ritabou, postu administrativu Maliana, munisípiu Bobonaro, Jonas Pinto Fernandes, preokupa tanba dadaun ne’e peste Karakól hahú ataka hare primeira epoka 2024-2025 ne’ebé kuda foin lalais ne’e.
Notísia Relevante: Peste Karakol hahú ataka natar ektare 300 iha Maliana
“Ami-nia problema ida mak peste karakol agora daudaun área natar hotu-hotu kuaze afetadu. Hare sira foin kuda ne’e mós han hotu. Problema mak ai-moruk atu rezolve problema ne’e stock out. La sala, agora daudaun Servisu Munisipál Agrikultura nia armajen ne’e ai-moruk stock out. Ita dependente ba ita-nia inan-aman sira lori tama ilegál mai, maibé sira mós lori limitádu entaun labele kobre hotu,” nia hateten ba Agência Tatoli iha Ritabou, sesta ne’e.
Biban ne’e, Ministru Agrikultura, Pekuaria, Peska no Floresta, Marcos da Cruz, promete sei tau-atensaun tanba problema peste ne’e tinan-tinan sempre akontese iha Maliana.
“Ita tenke iha meiu atu rezolve duni problema Karakól. Ita iha ai-moruk ne’e, ida ne’e ita-nia papél no responsablidade,” nia hateten.
Enkuantu, tuir dadus ne’ebé Agência Tatoli asesu iha Diresaun Servisu Munisipál Agrikultura, Munisípiu Bobonaro, iha tinan 2023 natar kuaze ektare 850 mak afetádu husi peste karakól no husi númeru ne’e natar ektare 300 mak hetan estragu maioria ne’ebé akontese iha Maliana.
Notísia Relevante: Agrikultura Bobonaro prepara distribui ai-moruk kombate peste Karakól
Jornalista : Sérgio da Cruz
Editór : Cancio Ximenes
