DILI, 03 fevereiru 2025 (TATOLI) – Governu liuhusi Institutu Nasionál Seguransa Sosiál (INSS), planeia no koordena ho banku komersiál sira iha Timor-Leste atu fasilita pagamentu dijitál ba benefisiáriu sira.
“Agora ita planu hela atu ba pagamentu dijitalizasaun, maibé la’ós tinan ida-ne’e maibé tinan ida rua mai tan, agora ita halo koordenasaun servisu hamutuk ho entidade banku sira, banku komérsial sira hanesan BRI, BNCTL, atu nune’e fasilita pagamentu kona-ba dijitalizasaun”, Prezidente INSS, Arlindo Pinto, dehan iha nia knaar fatin Caicoli, Dili, segunda ne’e.
Prezidente INSS, Arlindo Pinto hatutan tan katak liuhusi pagamentu dijitalizasaun ne’e ajuda tebes benefisiáriu sira.
“Mekanizmu pagamentu mak kuandu sistema ne’e kria hotu ona ita sei kordena ho banku para benefisiáriu sira-nia orsamentu ne’e tau hotu iha kartaun pagamentu ninia, atu nune’e banku komersiál sira sei monta hela sira-nia ajénsia iha kada nível suku ho keos sira ne’ebé sira identifika sira-nia ajénsia depois benefisiáriu kada fulan bele foti sira-nia osan iha ajénsia sira ne’ebé banku sira iha”, nia dehan.
Objetivu hosi programa pagamentu dijitál mak atu lori serbisu finanseiru bázika, liuliu pagamentu dijitál no pontu asesu finanseira bázika ba komunidade sira-ne’ebé iha área rurál hodi fasilita sira atu koñese saida maka pagamentu dijitál no fasilita sira pelumenus asesu uluk iha pagamentu iha pontu finanseiru sira-neʼebé besik.
Notísia relevante:Índia hakarak apoia TL iha área dijitalizasaun sistema identidade no pagamentu
Jornalista : Osória Marques
Editór: Rafael Ximenes de A. Belo
