DILI, 07 Fevereiru 2025 (TATOLI)-Eskola Téknika Informátika (ETI) realiza graduasaun ba dala-XXXIII, ba finalista na’in-216 ne’ebé ramata ona estudu iha periódu 2024.
“Finalista nain-216 ne’e maihusi departamentu tékniku jestaun ekipamentu informátika, indústria ekonómia no otelaria turizmu ne’ebé kompostu husi mane nain-141 no feto 75. Eskola ne’e ensinu sekundáriu maibé mós iha estájiu durante fulan-tolu iha ministériu sira inklui empreza”, Diretór ETI, João Gaio, dehan iha Fomentu, sesta ne’e.
Tuir nia, edukasaun mak bele muda mundu, tanba ne’e husu ba inan-aman sira atu kontinua investe oan sira iha koñesimentu.
“Husi edukasaun mak ita foin bele halo mudansa ba mundu. Tanba ne’e, husu ba inan-aman sira nafatin investe ita-nia oan sira ba edukasaun, liu-liu iha área tékniku vokasionál. Tanba liuhusi ensinu sekundáriu tékniku vokasionál sira bele deskobre sira-nia potensialidade atu bele garante ba kualidade nune’e bele kompete iha mundu teknolojia”, nia dehan.
Nia hatutan, nu’udar jerasaun foun labele lakon esperansa no vontade hodi aprende, mellora kreatividade, abilidade, inovasaun no kria buat foun ne’ebé mak bele responde ba demanda merkadu.
“Durante tinan tolu nia laran iha dezafiu oin-oin, maibé imi la rende hodi kontinua hakat to’o ohin loron imi bele finaliza ona imi-nia estudu ho di’ak. Matenek ne’ebé imi aprende ona labele para de’it iha ne’e kontinua ba oin hodi atinje buat ne’ebé imi hakarak, tulun ema ne’ebé imi bele tulun atu hamutuk kontribui ba dezenvolvimentu iha Timor-Leste”, nia informa.
Prezidente Fundasaun Klibur Matadalan, Pedro Barreto Ximenes, hatete momentu ne’e orgullu ba selebrasaun estudante sira no mós inan-aman sira.
“Enkoraja inan-aman sira katak desizaun ikus ne’e iha ita-nia oan sira-nia liman, tanba moris ne’e sira mak hala’o la’ós ita, ita-nia kbiit no ita-nia knaar mak akompaña no mós suporta sira”, nia dehan.
Nune’e mós enkoraja finalista sira kontinua hakat ba oin, karik falla koko atu hamrik fila fali labele tauk ho falla.
“Alin sira labele tauk atu falla, karik falla iha dalan koko hamrik atu kontinua nafatin, imi haree ema iha mundu ida susesu tebes ne’e barak maibé molok sira susesu ne’e mós sira falla dalabarak no rihun ba rihun. Labele tauk atu falla, brani hakat luan, mundu la’ós mak Timor de’it, ne’ebé hakat dook hodi hatene no rekolla buat di’ak iha ita-nia moris. Nune’e mós husu ba alin sira tenkeser lee livru, lee livru sa’ida de’it mak iha, tanba husi lee barak mak imi sei aprende buat barak”, nia tenik.
Sekretáriu Estadu Ensinu Sekundária Jerál no tékniku vokasional, Domingos Lopes Lemos, hateten Ministériu Edukasaun nia parte sente haksolok tebes.
“Graduadu sira husi ETI nian agora iha koñesimentu kle’an liu kona-ba siénsia no teknolojia, abilidade esensiál sira iha era globalizasaun nian. Edukasaun neʼebé ita hetan iha ETI la’ós de’it konjuntu koñesimentu tékniku, maibé mós justu meiu neʼebé robustu atu fó kbiit ba jerasaun foun sira hodi hanoin ho krítiku, kria no halo inovasaun, tulun iha dezenvolvimentu ba ita-nia Nasaun doben ne’ebé hasoru dezafiu iha sékulu 21″, nia argumenta.
Nia afirma, kreatividade no inovasaun ba mundu oin-loron laiha fronteira, tanba liuhusi teknolojia hanesan oportunidade utiliza abilidade hodi kria impaktu pozitivu iha sosiedade, importante liu mak kontinua aprende.
“Ha’u mós hakarak aproveita oportunidade ida-ne’e atu agradese ba profesór no funsionáriu sira iha ETI ne’ebé dedika tempu, koñesimentu hodi garante ita hotu hetan edukasaun ho kualidade” , katak nia.
Nia hakotu: “Parabéns ba graduadus hotu, ida-ne’e ba konkista importante liu, ita-boot sira prova viva katak traballu maka’as no dedikasaun halo diferensa ba ita nian moris, deseja susesu”.
Notísia relevante: Diretór ETI husu graduandu aprende-mellora dezenvolvimentu edukasaun iha futuru
Jornalista : Osória Marques
Editora : Rita Almeida
