DILI, 07 fevereiru 2025 (TATOLI)—Governu liuhosi Ministériu Negósiu Estranjeiru no Kooperasaun (MNEK) no parseiru internasionál sira liuhosi Programa Nasaun Unida ba Dezenvolvimentu (PNUD) no Organizasaun Mundiál Aihan (WFP), realiza fórum hodi ko’alia kona-ba programa estratéjia dezenvolvimentu Timor-Leste ba tinan 2026-2030.
“Ita-nia enkontru ohin marka inísiu konsultasaun parte interresada sira ba PNUD no WFP nian ba tinan 2026-2030, tanba ita iha períodu tranzisaun ida hosi programa atuál, ne’ebé ramata iha tinan ida-ne’e. Ita iha momentu krusiál ida hodi forma ita-nia futuru koletivu,” Ministru Bendito Freitas hateten ba jornalista sira iha edifisiu MNEK, sesta ne’e.
Tuir nia, programa PNUD nian no planu estratéjiku WFP nian tuir duni planu nasionál Timor Leste nian.
“Importante ba ami tanba parseiru ne’e apoiu ona dezenvolvimentu kapasidade ba ita-nia nasaun dezde 1999. Tanba ne’e, iha tempu ida-ne’e, mekanizmu konsultasaun ne’e importante tebes atu hadi’a, hodi haree parte sira-ne’ebé mak presiza hametin liután,” nia hateten.
Aleinde ne’e, nia dehan, mekanizmu konsultasaun ne’e esplika atu bele haree dezafiu ne’ebé Timor-Leste hasoru, liuliu atu hametin koordenasaun kooperasaun iha área hotu-hotu liuliu ho polítika Governu nian.
Iha fatin hanesan, Reprezentante WFP iha Timor Leste, Jacqueline de Groot informa, planu estratéjiku WFP nian foka liu ba seguransa ai-han no nutrisaun.
“WFP nia foku mak seguransa ai-han no nutrisaun, oinsá bele fasilita apoiu Governu hodi redús ma-nutrisaun iha rai-laran, liuliu oinsá hadi’a nutrisaun iha Timor-Leste,”nia hateten.
Nia hatutan, konsultasaun entre WFP ho PNUD kona-ba parseria estratéjiku, hodi haree ba planu tinan lima (5) tuir mai, entre WFP ho PNUD no oinsá bele fasilita di’ak liután bazeia ba planu estratéjiku ne’ebé Governu iha.
Iha fatin hanesan, Reprezentante PNUD, Katyna Argueta, informa konsultasaun ne’e atu identifika programa estratéjiku Governu Timor-Leste nian ne’ebé tuir duni PNUD.
“Ita iha ona dokumentu planu estratéjiku ida atu apoiu nasaun ida-ne’e no agora daudaun, ita hahú halo konsulta ho Governu no ministériu sira-ne’ebé ita servisu hamutuk, atu identifika saida mak liña Estratéjiku sira iha programa Estratéjiku Timor-Leste nia kotuk, programa Estratéjiku Timor-Leste iha pilár haat. Nu’udar instituisaun ida, ita koko atu haree oinsá ita bele apoia pilár ida-idak,” nia hateten.
Iha programa estratéjia dezenvolvimentu 2026-2030, pilár haat ne’ebé sei hetan apoiu husi PNUD no WFP mak hanesan kapitál sosiál, dezenvolvimentu infraestrutura, dezenvolvimentu ekonómiku, no enkuadramentu institusionál.
Jornalista : Hortencio Sanchez
Editór : Cancio Ximenes
