SSM Vikeke fahe brosura ba komunidade Uatulari kona-ba prevensaun moras dengue

VIKEKE, 20 Fevereiru 2025 (TATOLI)–Servisu Saúde Munisipál (SSM) Vikeke, kinta ne’e, fahe brosura kona-ba prevensaun moras dengue ba komunidade no autoridade sira husi suku Afalokai no suku Makadike, postu Uatulari.

Reprezentante SSM Vikeke, Fernando Soares, hateten, maski seidauk rejista moras dengue iha postu Uatulari, maibé distribuisaun brosura ne’e atu fasilita komunidade halo medida prevensaun ida-idak iha uma no bairru sira.

“Ohin ita distribui brosura prevensaun dengue ne’ebé ami hetan apoiu husi Care Timor-Leste no Fundasaun K’nua Haberan Komunidade hodi prodús brosura atu fahe ba komunidade no autoridade lokál sira iha Uatulari. Maski to’o agora munisípiu Vikeke seidauk rejista kazu dengue maibé ita tenke halo prevensaun. Tanba ne’e mak ita distribui ba komunidade hodi implementa iha sira ida-idak ninia uma,” Fernando Soares, hateten ba Agência Tatoli, hafoin ramata fahe brosura, iha postu Uatulari.

Nia konsidera, prevensaun moras dengue ne’e importante ba komunidade, nune’e tenke hamoos lixu no bee nalihun sira-ne’ebé besik uma.

Aleinde ne’e, stock fomigasaun iha SSM Vikeke sufisiente hela nune’e bainhira rejista moras dengue iha bairru ruma, ekipa responsável sira sei tun halo fomigasaun.

Notísia relevante : MS ho Menzie School no WMP diskute prevensaun dengue iha Timor-Leste

Medida prevensaun bainhira susuk tata mak hanesan uza replente ka ai-moruk susuk, elemina bee nalihun sira-ne’ebé fó fatin ba susuk hodi tolun, no uza moskiteru bainhira toba (loron no kalan).

Sintoma ba moras dengue baibain akontese duran loron 2 to’o 7, maibé kazu sira ne’ebé grave bele iha komplikasaun.

Iha fatin hanesan, Xefe suku Makadike, Afonso dos Reis, agradese ba SSM Viekeke tanba bele partilla informasaun ba komunidade.

“Atividade ne’e bele ajuda komunidade halo prevensaun ba moras dengue,” nia akresenta.

Jornalisra     : Vitorino Lopes da Costa

Editór            : Cancio Ximenes