DILI, 22 Fevereiru 2025 (TATOLI)—Prezidente Repúblika (PR), José Ramos Horta, konsidera Movimentu Renovasaun Karismátika Katólika (MRKK) dezempeña papél esensiál ida atu hamoris fali ita-nia espiritualidade no hafoun moris sarani.
Notísia Relevante: Movimentu Renovasaun Karismátika Katólika realiza konferénsia nasionál dahuluk
“Hodi Prezidente Repúblika nia naran, ha’u hato’o onra boot no ksolok ba ita-boot sira hotu iha konferénsia nasionál husi Movimentu Katóliku Renovasaun Karizmátika Timor-Leste nian. Permite ha’u, hato’o ha’u-nia agradesementu kle’an ba Movimentu Katóliku Renovasaun Karismátika Timor-Leste nian, ba Dioseze Díli, Baukau no Maliana, no mós ba parókia sira hotu ne’ebé reprezenta iha-ne’e. Ba sira-nia empeñu no dedikasaun hodi habelar fiar no hametin ita-nia povu nia espiritualidade,’’ Xefe Kaza Sívil Prezidénsia Repúblika, Jesuina Ferreira Gomes, hato’o diskursu Xefe Estadu nian iha konferénsia nasionál ba dahuluk husi Movimentu Katóliku Renovasaun Karismátika Timor-Leste iha Sentru Konvensaun Dili (CCD), sábadu ne’e.
Xefe Kasa Sívil, hato’o bem-vindu ba konvidadu sira husi Indonézia, ne’ebé sira-nia prezensa enrikese liután Konferénsia ida-ne’e no reforsa lasu amizade entre povu rai rua ne’e.
Timor-Leste nu’udar nasaun ida-ne’ebé marka kle’an ho valór kristaun, no iha fiar mak ita hetan forsa atu hasoru dezafiu sira iha ema ida-idak nia moris.
“Movimentu Renovasaun Karismátika Katólika dezempeña papél esensiál ida atu hamoris fali ita-nia espiritualidade no hafoun moris sarani. Ita boot sira-nia serbisu, bazeia ba orasaun no evanjelizasaun, kontribui makaas ba konstrusaun sosiedade ida fraterna no solidária liu,’’ nia akresenta.
Konferénsia Nasionál ida-ne’e, sai hanesan testemuñu ida tan, ba imi-nia kompromisu atu hametin komuñaun entre sarani sira, promove Kreda nia unidade no hafoun kompromisu ba Kristu nia hanorin sira. Espera katak ida-ne’e sai momentu ida partilla, reflesaun no kreximentu espirituál nian ba partisipante sira hotu.
“Permite, ha’u atu aproveita mós oportunidade ida-ne’e atu espresa, hodi Prezidente Repúblika nia naran, agradesimentu kle’an ba Dioseze, Parókia, Kongregasaun Relijioza sira hotu, relijioza no relijiozu konsagradu no leigu sira, ne’ebé hala’o knaar fundamentál iha preparasaun no implementasaun Vizita Apostólika Sua Santidade Amu-Papa Francisco nian mai Timor-Leste, ne’ebé hala’o iha loron 09 to’o 11 fulan-Setembru tinan 2024,’’ nia dehan.
Vizita istórika Santu Padre nian sai sinal inestimável ida ba nasaun Timor-Leste, hodi hametin sarani Timor-Leste nia fiar no hafoun povu timoroan tomak nia esperansa.
Resesaun kaloroza no partisipasaun makaas husi komunidade Katólika hatudu dala ida tan, Timor-Leste nia kompromisu ne’ebé metin ba valór Evanjellu nian.
Susesu husi vizita ida-ne’e sei la sai posivel sein sarani sira hotu nia serbisu inkansável, ne’ebé ho dedikasaun, zelu no organizasaun ezemplár, garante katak momentu ida-idak ne’ebé timoroan sira liu sai memorável.
Misa ne’ebé selebra iha Tasi-Tolu, ne’ebé halibur sarani liu 600.000, nu’udar sasin unidade no fiar ne’ebé laiha komparasaun.
“Obrigadu ba imi hotu ne’ebé halo sai posivel esperiénsia komuñaun no grasa nian ida-ne’e,’’ Nia hateten.
Jornalista : Nelson de Sousa
Editór : Cancio Ximenes
