DILI, 22 Fevereiru 2025 (TATOLI)—Movimentu Renovasaun Karismátika Katólika (MRKK) Timor-Leste, sábadu ne’e, realiza konferénsia nasionál dahuluk ho tema “Sois, um povo convocado pela palavra de Deus para ser ingressa na Comunião na participação ‘’, iha Sentru Konvensaun Dili.
“Atividade ne’e primeira konferénsia nasionál, no objetivu atu fó sai estrutura foun, tanba iha dezembru tinan kotuk ami hala’o ona kongresu hetan ona estatutu definitivu, aleinde fó sai programa foun husi estrutura,’’ Koordenadór Jerál Karismátika Timor-Leste, Gaspar Amaral Fernandes, hateten ba jornalista sira iha CCD.
Nia dehan, tema ne’ebé hili ida-ne’e atu hatete ba timoroan tomak ne’ebé Katóliku no la’ós Katóliku hotu-hotu tenke iha unidade ida no unidade kristu nian mak domin, sein diskriminasaun, organizadu, hanesan Kristu organizadu, corpo de cristo, corpo Igreja ida ne’ebé organizadu, fiar ba espíritu santu ida ne’ebé bein orden, sidadaun no sarani ida-ne’ebé di’ak.
“Tanba ne’e, husi tema ne’e, la’ós eduka de’it membru karismátiku, maibé ba ema timoroan hotu atu komtempla ita ema kriatura moris ne’e formadu husi liafuan Deus Maromak nia futar lia, Maromak ida-ne’ebé ita adora, Maromak ida Santu, agora Maromak Santu ida-ne’ebé ita fiar ba ne’e Santu, tanba bein orden,’’nia dehan.
Koordenadór hne’e hato’o programa MRKK tinan ne’e mak sei kria retiru formasaun iha diozese tolu Baukau, Dili no Maliana, hanesan iha fulan-Maiu sei realiza uluk ba iha dioseze Baukau nian ne’e formasaun nível nasionál, maibé foka liu ba aprofundasaun fé no koñesimentu esperituál, daruak mak katekizmu Katóliku.
MRKK nu’udar movimentu leigu ema sarani sira-nian ne’ebé hamahan aan iha kreda Katólika la’o kle’ur ona, daudaun iha membru 1.576 husi diozese tolu.
Durante ne’e MRKK ninia atividade hala’o mak retiru inisiasaun espíritu santu, atu renova hakle’an de’it koñesimentu sakramentu batizmu, maibé ho matéria no métodu sira-ne’ebé atu orienta komtempla katak, sira-ne’e Maromak nia saseluk ne’ebé sai autór ba domin katak, prátika buat hotu ho domin, pás, tane solidariedade umana.
Iha konferénsia nasionál ne’e, konvida mós oradór husi parte Konferénsia Episkopál Timorense (CET), Núnsiu Apostóliku Vatikanu iha Timor-Leste, Monseñor Marco Sprizzi, Reprezenta Prezidente Repúblika, liuhusi Xefe Kasa Sívil, Jesuina Ferreira Gomes, hodi hato’o matéria hanesan formasaun husi oradór sira ba partisipante sira.
Sekretáriu Konferénsia Episkopál Timorense, Pe. Carlos Rubin, kongratula no hato’o apresiasaun ba inisiativa husi MRKK Timor-Leste nian hodi organiza konferénsia ida-ne’e ho tema jerál ne’ebé iha.
“Ita bo’ot sira hotu Maromak nian, bolu konvida hamutuk husi Maromak nia futar liafuan atu sai Igreja ida-ne’ebé hatene moris hamutuk, tema ida-ne’ebé hatudu katak movimentu ida ne’e hakarak la’o hamutuk ho Igreja universál,’’ nia dehan.
Núnsiu Apostóliku Vatikanu iha Timor-Leste, Monseñor Marco Sprizzi, Sente haksolok ho movimentu karismátiku tanba koñese di’ak movimentu karismátiku ne’e tinan 50 liu ona tanba sira-nia prezensa boot, nune’e gosta no apresia movimentu karismátiku sira-nia membru nia fiar no espíritu ksolok.
Entretantu, iha konferénsia ne’e partisipa husi membru movimentu karizmátiku husi diozese tolu no partisipa mós membru karismátika Katólika husi Kupang, Atambua, Jawa no Malang, Indonézia.
Jornalista : Nelson de Sousa
Editór : Cancio Ximenes
