Atendimentu pasaporte iha Lautein fulan ida dala-haat
LAUTEIN, 06 Marsu 2025 (TATOLI)—Diretór Diresaun Munisipál Konservatóriu Servisu Rezistu Notariadu Munisípiu Lautein, Amandio Alves Gomes, hateten dauzaun ne’e halo atendimentu ba sidadaun ne’ebé trata pasaporte la’o normal maibé fulan ida halo atendimentu dala-haat bazeia ba orientasaun husi Notariadu Nasionál.
“Provizoriamente ho situasaun balun ne’ebé ami enfrenta iha nasionál ba iha ekipamentu balun ne’ebé iha balun avaria hela, maibé Ministériu Justisa foti ona desizaun. Entaun, atu atende pasaporte iha ne’e tuir oráriu husi nasionál, kada fulan ida ami halo atendimentu dala-haat, semana ida dala ida,” Diretór ne’e hateten ba Agência TATOLI iha edifisiu Notariadu Lautein, tersa (04 Marsu 2025) ne’e.
Iha fulan-Marsu, nai dehan, atendimentu ba pasaporte iha Lautein dala-tolu de’it tuir oráriu ne’ebé fó husi nasionál mak iha loron 04 fulan_Marsu, loron 10 fulan-Marsu no loron 17 fulan-Marsu, enkuantu iha fulan-abril sei halo atendimentu fulan ida dala-haat.
“Ita-nia sidadaun sira iha Lautein ne’e atu trata pasaporte ho volume ne’ebé aas ho nesesidade ne’ebé la hanesan. Balun atu ba Korea, balun atu ba Australia no balun atu ba eskola. Balun ne’ebé ho moras atu ba halo tratamentu, ita halo atendimentu ne’ebé urjente ba sira,” nia dehan.
Tuir desizaun ne’ebé fó husi Notariadu Nasionál iha loron ne’ebé halo atendimentu atende de’it ba sidadaun hamutuk na’in-20.
“Tratamentu ba pasaporte tuir loron ne’ebé termina ona, ami so simu ema na’in-20 de’it. Ida-ne’e, tuir orientasaun husi nasionál, ida ne’e atu fó biban ba sira nasionál halo imprime hodi tau iha kaixa Munisípiu atu nune’e funsionariu Munisípiu nian bele ba rekolla, hanesan Lautein bele ba kedan ho Lautein nia lista atu haree loos ona bele lori ona mai Lautein,” nia tenik.
Nia dehan, prosesu atu foti pasaporte ne’ebé halo ona ne’e tuir tempu ne’ebé determina, se loron ida tanba distánsia dook entaun sira-na’in bele ba foti rasik iha nasionál, se loron 10 nian entaun sira hein de’it funsionariu Munisípiu mak ba foti.
“Sira ida halo loron ida nian ne’e tanba urjente, sira atu sai ba li’ur tenke liuhusi Dili, entaun sira halo tiha iha ne’e, sira bele ba kedan Dili hodi foti no semo ba rai-li’ur,” nia dehan.
Aleinde ne’e, kona-ba tratamentu ba sertidaun nascimentu, guia de óbitu, Billete Identidade no sertidaun kazamentu, Notariadu Lautem halo atendimentu normál ba sidadaun sira no kada loron sidadaun ne’ebé trata bele foti kedan.
Iha fatin hanesan, sidadaun Tomas Gama Marques ne’ebé trata guia de óbitu hateten, atendimentu Notariadu Lautein di’ak tebes no la halo sira hein kle’ur.
“Ha’u mai iha ne’e trata guia de óbitu, ida-ne’e tanba ha’u-nia inan-aman mate iha funu laran, Estadu fó sai ona sira nia naran entaun ha’u mai iha ne’e atu trata guia de óbitu. Maibé, ha’u mai iha ne’e trata loron ida foti kedan. Sira-nia servisu iha ne’e kapaas los,” nia hateten.
Jornalista : Hortencio Sanchez
Editór : Cancio Ximenes
