LAUTEIN, 06 Marsu 2025 (TATOLI)—Prezidente Autoridade Munisipiu (PAM) Lautein, Melio de Jesus, hateten prosesu konkursu públiku ba konstrusaun merkadu foun iha nunisípiu Lautein konkluidu hein anúnsiu rezultadu.
“Prosesu konkursu públiku ba konstrusaun merkadu foun la’o hotu ona, hein de’it fó sai rezultadu empreza ida-ne’ebé mak manán hahú ona konstrusaun. Nune’e mak Governadór Banku Sentrál Helder Lopes husu ha’u atu asegura nafatin prosesu merkadu ne’e atu bele la’o lalais uitoan,” Melio hateten ba Agência TATOLI iha nia kna’ar fatin iha edifisiu PAM Lautein, tersa (04 Marsu 2025) ne’e.
Nia dehan, konstrusaun ba merkadu foun ne’e, orsamentu aloka husi Ministériu Komérsiu Indústria (MKI) ho montante hamutuk millaun $14.
Merkadau foun ne’ebé atu konstrui iha Munisípiu Lautein lokaliza iha aldeia Bemoris, suku Fuiluru, postu administrativu Lospalos, munisípiu Lautein.
Totál Orsamentu Jerál Estadu (OJE) 2025 ba munisípiu Latein hamutuk millaun $8.6. Husi totál ne’e fahe ba kapitál dezenvolvimentu hamutuk rihun $900 ne’ebé sei implementa ba projetu hamutuk neen (6) foun ho nia orsamentu hamutuk rihun $500-resin.
Maibé ba Munisípiu Lautein ba tinan ida-ne’e ho projetu hotu ne’ebé tau husi munisípiu rasik no Governu sentrál liuhusi fundu infraestrutura kona-ba hadi’a estrada sira, loke merkadu munisípiu nian foun no projetu seluk tan hamutuk millaun $240.
Jornalista : Hortencio Sanchez
Editór : Cancio Ximenes
