LAUTEIN, 06 Marsu 2025 (TATOLI)–Agência Notisiosa de Timor-Leste, Institutu Públiku (TATOLI, I.P) liuhusi Vise-Prezidente Asuntu Mídia no Jornalístika, Zezito da Silva, hasoru malu ho Prezidente Autoridade Munisípiu (PAM) Lautein, Melio de Jesus, hodi diskute kona-ba futuru kooperasaun atu bele servisu hamutuk.
“Hasoru-malu ida-ne’e atu ita ko’alia diritamente ho Prezidente Autoridade, atu informa kona-ba servisu TATOLI nian ho objetivu ida oinsá atu tranzmite ba funsionáriu no públiku hotu kona-ba servisu prinsipál TATOLI nian. Iha okaziaun ne’e, ita mós ko’alia kona-ba kooperasaun entre TATOLI ho Prezidente Autoridade Lautein ninian, tanba TATOLI iha hela faze preparativu atu rekruta jornalista hodi destaka ba Munisípiu hotu inklui Lautein. Ida-ne’e mak ita ko’alia atu halo kooperasaun servisu bainhira TATOLI nia ema ruma mai iha ne’e bele servisu hamutuk ho di’ak,” Zezito da Silva hateten ba Agência TATOLI iha nia kna’ar fatin, iha edifisiu PAM Lautein, tersa (04 Marsu 2025) ne’e.
Ba oin, nia dehan iha tinan 2026 ne’e Agência TATOLI, I.P tau ona iha planu orsamentu atu rekruta jornalistasira hodi destaka mós jornalista na’in-ida iha munisípiu Lautein.
“Ita atu tau jornalista ida iha Lautein ho objetivu ida katak jornalista ne’e bele atualiza progresu ka prosesu dezenvolvimentu Lautein nian kada loron,” nia hateten.
Aleinde ne’e, TATOLI, I.P mós atualiza ba PAM Lautein kona-ba programa televizivu foun husi TATOLI, I.P nian ne’ebé hanaran “HAKBESIK”.
“Iha oportunidade ne’e, ita mós atualiza ba Prezidente Autoridade kona-ba ita-nia programa foun ida naran “HAKBESIK”, katak TATOLI hakarak haree no observa di’ak liutan kona-ba prosesu tomak ne’ebé mak la’o iha territóriu hotu inklui munisípiu Lautein, partikularmente dezenvolvimentu iha setór hotu. Iha hasoru-malu ne’e Prezidente Autoridade simu ita ho di’ak tebes no prontu atu halo kooperasaun servisu ho ita,” nia dehan.
Prezidente Autoridade Munisípiu (PAM) Lautein, Melio de Jesus, hato’o agradesimentu ba Agência TATOLI ne’ebé iha inisiativa ne’ebé di’ak hakarak halo kooperasaun servisu hamutuk.
“Agradese tebes ba Agência TATOLI, ami Munisípiu Lautein nakloke atu simu bainhira de’it mak atu destaka jornalista TATOLI mai iha ne’e. Iha ne’e, fatin mak susar uitoan ba ita-boot sira nia jornalista atu utiliza ba halo servisu iha fatin mesak, maibé fatin iha administrasaun ne’e iha. Ami bele fó ba ita-boot sira, ita mós iha Radiu Komunidade Lautein, ida ne’e Estadu nian ita-boot sira bele utiliza halo servisu,” nia dehan.
Nia hatutan, kona-ba rai mamuk no uma ne’ebé mamuk iha, bainhira TATOLI iha rasik orsamentu atu halo reabilitasaun hodi utiliza ba fatin servisu ba jornalista destakadu ne’e bele.
“Rai Estadu nian mamuk iha, uma sira ne’ebé mamuk ho kondisaun aat iha ne’e barak hele. Se ita-boot sira iha rasik orsamentu atu halo reabilitasaun ne’e di’ak liután, ami bele oferese. Se ita-boot sira seidauk iha osan, laiha buat ida, ami bele oferese fatin iha administrasaun nian, ba ita-boot sira hala’o servisu. Ita-nia kooperasaun servisu hamutuk hodi divulga informasaun kona-ba progresu dezenvolvimentu Lautein nian ne’e importante tebes,” nia hateten.
Kumprimentu ba despaixu aprovasaun ho oficio nú: 02/TATOLI/II/2025 husi Presidente do Conselho Diretivo da TATOLI, I.P, iha loron Kuarta-Feira 25 fulan-Fevereiru 2025, delega komperténsia servisu esterna TATOLI, I.P ba Vise Prezidente asuntu Mídia no Jornalístika, hodi reprezenta Presidente atu reune ho Prezidente Autoridade Munisípiu Lautein hodi aborda kona-ba kooperasaun.
Vise Prezidente ba asuntu Mídia no Jornalístika, Zezito da Silva, iha ámbitu sorumutu ho Prezidente Autoridade Munisípiu Lautein, Mélio de Jesus, aprezenta pontu hirak tuir mai ne’e;
Lori Presidente do Conselho Diretivo da TATOLI, I.P nia naran, hato’o komprimentu ba Prezidente Autoridade Munisípiu Lautein ho nia funsionáriu tomak
Introdús Ajénsia Notisioza Ofisiál Estadu nian ho nia misaun, vizaun, prinsípiu, natureza, karáter no objetivu sira
Aprezenta pedidu edifísiu TATOLI, I.P nian iha Lautein. Bainhira TATOLI, I.P halo ona rekrutamentu ba jornalista sira destakadu (Lautein) iha 2026.
Aprezenta programa foun ne’ebé hanaran “Hakbesik” no “Tatoli Klarifika” husi rezultadu aprezentasaun husi Vise Prezidente ba asuntu Mídia no Jornalístika, Zezito da Silva, mak Prezidente Autoridade Munisípiu Lautein, Mélio de Jesus, agradese no subliña pontu hirak tuir mai ne’e;
Prezidente Autoridade Munisípiu Lautein, fó Bem-Vindu no agradese ba informasaun sira TATOLI, I.P nian ne’ebé introdús husi Conselho Diretivo da TATOLI, I.P.
Pedidu edifísiu TATOLI, I.P nian iha Lautein, Prezidente Autoridade Munisípiu Lautein, loke dalan ba TATOLI, I.P bainhira jornalista prontu ona atu destaka; fatin provizóriu (Disponibiliza sala ida iha Administrasaun Lautein, bele hamutuk fatin ne’ebé RTTL, E.P uza no TATOLI, I.P iha autonomia administrativa, finanseira no patrimóniu rasik.
Karik ba oin mak TATOLI, I.P iha orsamentu, bele mós halo edifísiu foun ou bele halo reabilitasaun ba edifísiu Estadu, Prezidente Autoridade Munisípiu Lautein prontu koopera programa saida de’it mak TATOLI, I.P iha.
Jornalista : Hortencio Sanchez
Editór : Cancio Ximenes
