BOBONARU, 07 Marsu 2025 (TATOLI)—Kondisaun estrada iha área Hol-lak, Ili-Bole, suku Oe-Leu, postu administrativu Bobonaru, munisipiu Bobonaru, aat grave nakonu ho taho no rai namdoras, tanba udan boot ne’ebé akontese iha sesta (07/03) hodi difikulta kareta ho motor halo movimentu husi Kapitál Maliana ba postu administrativu Bobonaru no Loloto’e.
Reprezentante komunidade Oe-Leu, Felisberto Antonio dos Santos, sente triste no husu Governu atu hadi’a estrada iha área ne’e atu labele haterus komunidade atu movimenta ba-mai hodi hala’o sira-nia atividade.
Notísia Relevante:Estrada diresaun Maliana-Bobonaru iha fatin tolu ameasadu kotu
“Na’i-ulun sira, favór boot ida loke matan haree netik ami-nia estrada ne’e. Hadi’a tiha ba, tanba tinan-tinan kuandu udan ona ne’e, ami sempre hasoru situasaun ida-ne’e. Kareta sa’e ladi’ak, dalaruma udan ami bokon hein to’o rai maran uitoan tiha mak dada malu sa’e ba. Se lae, labele, pasiénsia hein to’o kalan. Kuitadu, ami-nia sasán sira mós estraga hotu. Estrada ida-ne’e halo ami book-aan ladi’ak,” Nia informa ba Agência Tatoli iha fatin akontesimentu, sesta ne’e
Reprezentante komunidade postu Bobonaru no Loloto’e, Etelvina de Jesús, husu ba Governu atu halo normalizasaun urjénsia hodi fasilita movimentasaun públiku, tanba kondisaun atuál Estrada ne’e grave no la permite komunidade atu halo viajen iha tempu udan.
Tuir Etelvina, problema ne’e afeta tebes ba komunidade nia atividade ekonomía, asesu fasilidade saúde, lori produtu lokál ba merkadu no atividade seluk tan.
“Ami povu kiik ne’e buka moris araska tiha mak agora dalan mós hansan ne’e, ami-nia moris ne’e atu sai oinsá. Tanba, atu hodi sasán Kioske nian ba faan iha Bobonaru mós udan hanesan liu la di’ak. Hein malu, hanesan de’it, karreta ida mout (patina) entaun karreta seluk ne’e hein to’o nia sai mak foin ida ba fali tan. Depois, dalan ne’e mós subida (rai-lolon) tan. Karik, iha Bobonaru ema ruma moras atu lori ba Maliana ladi’ak, kareeta forma naruk ida hansan ular ne’e atu liu iha ne’ebé,” nia dehan.
Enkuantu problema kona-bá estrada ne’e líder komunitária sira hahú husi estruturaa anteriór no atuál hato’o bebeik ona ba Autoridade Munisípál Bobonaru hodi enkamiña ba ministériu kompetente maibé to’o agora seidauk iha resposta ruma.
Aleinde ne’e, iha fulan kotuk ne’e mós, administradór postu administrativu Bobonaru, Tomás Henriques, hasoru malú direta ho Ministru Obra Públika, Samuel Marçal, hodi hato’o problema ne’e no entrega kedas pedidu normalizasaun emerjénsía, tanba haree katak kondisaun fizikamente estrada ne’e nakfera, aat hotu no nakonu ho bee-nahilun.
Estrada ne’e nu’udár estrada alternativu liga husi kapitál Maliana ba postu administrativu Bobonaru no Loloto’e, inklui postu administrativu Átsabe, ,unisípiu Ermera no postu administrativu Zumalai, munisípiu Kovalima.
Notísia Relevante: Administradór hato’o preokupasaun problema Estrada Maliana-Bobonaro ba MOP
Administradór hato’o preokupasaun problema Estrada Maliana-Bobonaro ba MOP
Jornalista : Sérgio da Cruz
Editór : Cancio Ximenes
