DILI, 12 Marsu 2025 (TATOLI)—Ministru Interiór, Francisco da Costa Guterres, hateten Ministériu Interiór (MI) seidauk bele hasai despaxu rekrutamentu ba membru foun Polísia Nasionál Timor-Leste (PNTL) tanba sei prepara hela kondisaun.
“Ami forma daudaun kestaun legál, regulamentu, kritéria no kuota. Aleinde ne’e, ami mós sei harii komisaun supervizaun no fiskalizasaun para depois tau-matan kona-ba prosesu sira la’o tuir regra no tuir lei, para ita garante transparénsia,” Francisco hateten ba jornalista sira iha Palácio do Governo, kuarta ne’e.
Nia esplika, komisaun supervizaun no fiskalizasaun ninian objetivu ne’e atu hatudu katak sé mak tama Polísia Nasionál Timor-Leste tenke prenxe kritériu ne’ebé definidu ona.
Notísia relevante: Rekrutamentu membru PNTL foun tenke tau sees interese família
“Para aban-bainrua nia sente nia aan ne’e dehan katak ha’u tama polísia ne’e tanba ha’u-nia kapasidade. Ha’u la’ós tama polísia ne’e tanba ema ida mak dudu ha’u tama,” nia subliña.
Governante ne’e sita rekizitu balun rekrutamentu nian katak ema ne’ebé konkorre tenke ho idade 18-24, fíziku tenke di’ak no livre husi moras. Más, rekizitu sira-ne’e ekipa sei haree hodi halo diskusaun kle’an molok foti desizaun.
Jornalista: Natalino Costa
Editór: Xisto Freitas da Piedade
