DILI, 17 Marsu 2025 (TATOLI)—Prezidente Komisaun G iha Parlamentu Nasionál (PN) ne’ebé trata asuntu Edukasaun, Juventude, Kultura no Sidadania, Armando dos Santos Lopes, husu ba Governu Timor-Leste no Portugal atu solusiona preokupasaun estudante timoroan sira iha Portugal.
“Ha’u iha preokupasaun, hakarak atu husu ba Governu atubele esplika took mai ami kona-ba notísia portugeza semana rua ka tolu liubá, cerca de 30 estudante inklui traballadór timorense ne’ebé hela iha Portugal, katak sira hela iha Portugal hola desizaun pagamentu ba taxa, sira ezije tanba problema dezegualidade,” Reprezentante povu ne’e hato’o liuhusi reuniaun plenária PN, segunda ne’e.
Nia dehan, sira halo komparasaun entre membru Komunidade País Lian Portugés (CPLP, sigla portugés) no Timor-Leste, país seluk ne’ebé hela iha ne’ebá selu taxa pur volta €56,80, maibé timoroan sira iha ne’ebá selu €397,90 kada fulan.
“Tanba ne’e, ita-nia estudante sira ezije katak dezegualidade akontese iha ne’ebá ita hotu-hotu iha membru CPLP, nune’e husu sensiriedade nasaun rua atu haree asuntu ne’e,” nia hato’o.
Notísia relevante : Liña ministeriál kontinua diskute preparativu ba jogu CPLP
Deputadu dehan, Timor-Leate iha direitu hanesan membru CPLP, maibé kona-ba selu pagamentu ba taxa temporária hela iha ne’ebá iha diferensa.
“Ida-ne’e mak ita-nia estudante sira halo manifestasaun iha Portugal,” nia akresenta.
Iha biban hanesan, Reprezentante Governu liuhusi Vise-Ministru asuntu Parlamentár, Adérito Hugo, sei pasa informasaun ne’e ba Ministériu Negósiu Estranjeiru no Kooperasaun (MNEK).
“Ida-ne’e sei envia ba MNEK atu haree asuntu ne’e, tanba ita-nia misaun diplomátika iha Portugal no adidu barak loos ho renumeratóriu a’as, espera sira ne’ebé destaka iha Lisboa labele toba, tenke akompaña hodi haree ita-nia sidadaun barak iha ne’ebá, liuliu estudante sira. Se sira hatete katak Embaixada mós hatene ona la liga rai, ita-nia diplomata sira hela iha ne’ebá toba de’it karik, tanba ne’e mak ita-nia estudante sira tenke halo konferénsia imprensa hodi espresa sira-nia situasaun ne’ebé lamenta tanba injustisa boot ida,” nia katak.
Governante ne’e hatutan, se país membru CPLP sira seluk iha Portugal bele goza rejime komunidade ne’e ninian ba edukasaun no seluk, tanba saida mak Timor-Leste hanesan país membru ativu ne’ebé iha kuota insentiva la simu tratamentu hanesan ho país seluk.
“País membru sira seluk nia estudante iha ne’ebá simu taxa eskolar ne’ebé baratu tanba asesu ba CPLP nia benefísiu, maibé Timor-Leste ninia estudante sira la’e. Espera ita-nia diplomata sira ne’ebé destaka iha ne’ebá hanesan Embaixadór no adidu bele halo serbisu bainhira haree povu ne’e preokupa,” nia katak.
Jornalista : Nelson de Sousa
Editora : Julia Chatarina
