DILI, 14 Marsu 2025 (TATOLI)–Ministru Juventude Desportu Arte no Kultura (MJDAK) Nelyo Isaac Sarmento, hateten ekipa liña ministeriál hahú halibur malu hodi diskute ba preparasaun jogu Komunidade Nasaun Ko’alia Lian Portugés (CPLP-sigla portugés) ne’ebé sei realiza fulan jullu mai ne’e iha Timor-Leste.
Notísia Relevante: Nasaun membru kompromete apoia TL hodi susesu sai uma-na’in ba Jogu CPLP 2025
“Ida-ne’e hanesan reuniaun dahuluk hodi diskute kona-ba atividade sira-ne’ebé mak ita atu hala’o durante jogu CPLP antes no depois. Ita mós partilla ba komisaun liña ministeriál katak preparativu ita-nian ba jogu CPLP ne’e iha atividade tolu importante ba ita-nia nasaun,” Ministru Nelyo hateten ba jornalista sira iha Sentru Konvensaun Dili (CCD-sigla portugés), sesta ne’e.
Nelyo esplika, atividade tolu ne’e mak hanesan, jogu CPLP ba da-12, konferénsia Ministru Juventude Desportu nasaun CPLP sira no konferénsia juventude nasaun CPLP nian.
“Atividade hotu sei akontese iha fulan-Jullu, ida-ne’e mak komisaun interministeriál halo aprezentasaun no avaliasaun sira-ne’ebé ekipa tékniku husi CPLP foin lalais mai halo. Sira rekomenda ba Governu entaun ita partilla ba liña ministeriál ne’ebé tama iha komisaun atu hatene hodi hala’o servisu ruma tuir kuridór ne’ebé iha. Nune’e, ita mós ko’alia kona-ba orsamentu sira-ne’ebé atu finánsia ba ita-nia jogu CPLP ne’e, ida-ne’e hanesan enkontru primeiru no parte hotu apresia ho ita-nia aprezentasaun sira,” nia dehan.
Husi enkontru ne’e mak komisaun liña ministeriál halo apresiasaun ba orsamentu hamutuk millaun $3.7 ne’ebé atu utiliza ba jogu CPLP, nune’e Ministériu Finansa bele hasai ona osan balun atu uza ba atividade prioridade sira-ne’ebé atu realiza iha faze dahuluk.
“Agora ita komesa la’o ona iha faze implementasaun ba preparativu sira. Ita hotu hatene katak atividade ne’e foin primeiru hala’o iha ita-nia nasaun, maibé nia impaktu pozitivu ba ita-nia nasaun iha área diplomasia liuhusi desportu. Entaun, ita presiza duni promosaun ba atividade ida-ne’e, mídia sira importante tebes atu partisipa liuliu mídia sira iha rai-li’ur no rai-laran,” nia tenik.
Importánsia husi atividade ne’e atu faan mós Timor-Leste nia identidade ba nasaun membru seluk no nasaun sira iha ASEAN bele haree katak Timor-Leste bele organiza eventu internasionál sira.
“Loos! Ita sei menus iha parte balun maibé ida-ne’e la’ós sai hanesan obstakulu ba ita atu labele iha responsabilidade atu jere eventu sira hanesan ne’e iha ita-nia rain. Maibé, ita bele atu jere eventu sira hanesan ne’e tanba orsamentu ita prepara másimu atu organiza jogu sira-ne’e,” nia dehan.
Kona-ba halo reabilitasaun ba infrastrutura hirak ne’ebé atu prepara ba jogu ne’e, nia tenik, epmreza balun konkorda ona ho Governu sira hahú halo ona reabilitasaun ba fatin sira hanesan Estádiu Munisipál Dili, Voleiból Praia nia fatin, Kampu Tenis, sira hala’o ona servisu, kontratu ne’e ita hein verifikasaun husi Ajénsia Dezenvolvimentu Nasionál (ADN) hotu mak asina ikus.
“Duké hein kontratu sira tenke adianta ona buat balu para finaliza obra ne’e tuir tempu ne’ebé ita termina. Ita-nia meta mak antes atu tama ba fulan-Jullu realiza jogu CPLP ne’e, fasilidade hotu atu utiliza ba jogu ne’e hotu-hotu konklui.
Kona-ba empreza ne’ebé mak daudaun ne’e hala’o ona servisu, Ministru ne’e seidauk bele ko’alia sai tanba seidauk iha kontratu, bainhira kontratu la’o foin fó sai empreza nia naran.
Jogu CPLP ba tinan ida-ne’e sei realiza iha 17-27 Jullu ne’ebé sei partisipa husi nasaun membru sira hanesan Portugál, Brazil, Guniné Bissau, Guiné Ecutorial, Moçambique, São Tome e Principe, Caboverde, Angola no Timor-Leste rasik.
Total orsamentu ba jogu CPLP husi preparasaun to’o ramata Governu tau ona orsamentu tinan 2025 nian ho montante millaun $3.7.
Jogu CPLP tinan ida-ne’e sei hetan partisipasaun másimu husi Estadu-membru sira, ho delegasaun hanesan Angola ho partisipante 101, Brazil 101, Caboverde 101, Guiné-Bissau 61, Guiné Ekuatoriál 35, Mosambike 70, Portugál 101, São Tomé e Prínsipe 35 no Timor-Leste 101.
Eventu importante ida-ne’e hatudu Timor-Leste nia kompromisu atu haburas interkámbiu kulturál no atlétiku iha komunidade CPLP nia laran.
Notísia Relevante: Ekipa CTA identifika ona fatin ba jogu CPLP
Jornalista : Hortencio Sanchez
Editór : Cancio Ximenes
