DILI, 28 Marsu 2025 (TATOLI)–Diretór Nasionál Ensinu Sekundáriu Jerál (DNESJ), Benjamin Fernandes, informa Ministériu Edukasaun (ME), hahú ona loke vaga Ensinu Sekundáriu iha loron 24 Marsu to’o 07 Abríl, tinan ne’e.
“Tinan ne’e bolsa kandidatu ba datoluk nível ensinu sekundáriu nian, ne’ebé ita loke ona dezde segunda semana liubá (24/03/2025). Ensinu Sekundáriu ne’e presiza profesór kuaze 1.500,” nia dehan iha nia kna’ar fatin, Vila Verde, sesta ne’e.
Nia dehan aplikasaun ba vaga referida liuhusi online depois sei hatudu QR (Quick Response Code) ne’e iha Ministériu Edukasaun nia ema iha kada munisípiu. Basá, QR ne’e mak hatudu kada kandidatu nia identidade, valór, husi munisípiu ne’ebé no hili área saida. Ida-ne’e kompletu ona iha-ne’ebá.
“Maibé, nível sekundáriu ne’e ba de’it kandidatu ne’ebé lisensiadu, baxarelatu lae. Tan ne’e, husu ba ema hotu-hotu iha territóriu atubele aplika vaga ne’e, ne’ebé bazeia ba ita-nia abilitasaun literária,” nia esklarese.
To’o agora, Benjamin hateten, tuir informasaun ne’ebé iha katak kandidatu kuaze rihun-haat ona mak submete nia dokumentu.
Diretór ne’e rekoñese katak eskola ensinu sekundáriu sei menus profesór.
“En-prinsípiu, eskola ensinu sekundáriu iha territóriu ne’ebé profesór menus ne’e iha matéria língua portugeza, lian tétun ho tan disiplina ida multimídia, desportu, no mós matéria sira seluk. Ho ida-ne’e mak Ministériu Edukasaun loke vaga,” nia katak.
Nia salienta kuandu menus profesór mak diretór eskola tenke jere oinsá estudante sira labele lakon disiplina ida.
“Diretór eskola hotu-hotu iha nia maneira oinsá jere profesór iha kada eskola. Kuandu profesór ba disiplina ida mak laiha tenke buka profesór ne’ebé iha koñesimentu ba disiplina ne’ebé laiha,” nia tenik.
Totál profesór ba ensinu sekundáriu ne’ebé sai ona permanente iha territóriu hamutuk 1.394. hosi totál ne’e, Ministériu Edukasaun aloka osan millaun $6-resin. ida-ne’e ba tinan ida nian.
Jornalista: Osória Marques
Editór: Xisto Freitas da Piedade
