DILI, 02 Abríl 2025 (TATOLI)-Ministériu Edukasaun (ME), entrega ona estudante ne’ebé falsifika diploma ba Polísia Sientífika ba Investigasaun Kriminál (PSIK) hodi halo identifikasaun.
“Semana kotuk ami halo ona investigasaun no verifikasaun internalmente ho eskola ne’ebé nia naran hakerek, eskola 4 Setembru UNAMET Balide. Katak, estudante ne’e nia la’ós finalista 2022 iha eskola referida”, dehan Auditór Investigasaun iha ME, José de Deus, ba TATOLI iha ninia knaar fatin Vila Verde, kuarta ne’e.
Nia hatutan: “Ami bolu ona Diretór Servisu Edukasaun Munisípiu Dili ho Diretór Eskola justifika ona katak númeru ezame estudante (falsifika diploma) nian ne’e boot liu fali númeru finalista hosi siénsia teknolojia”.
Nia informa, koordena ona ho parte PSIK hodi halo identifikasaun ba keixa ne’ebé aprezenta. “Bazea ba esperiénsia tinan rua liubá, autór sira falsifika diploma hanesan ne’e ita difisil atu deteta”.
“Tanba labarik ne’ebé kaer diploma falsa ne’e nunka ida mak atu dehan loos kona-ba diploma maihusi ne’ebé. Sira dehan de’it diploma ne’e hosi ne’ebé ami lahatene, sira mai falun oin metin ami la koñese, sira lori diploma mai faan no ami sosa de’it. Entaun ho ida-ne’e inspesaun jerál laiha kbiit atu buka autór iha li’ur”.
Nia dehan periodukamente PSIK kuandu identifika mak ME sei deside. “Ita nafatin fó hanoin ba ita-nia Ministra Edukasaun, esperiénsia tinan kotuk ita rekomenda atu follow up rekomendasaun sira-ne’e”, nia dehan.
Sekretáriu Estadu Ensinu Sekundáriu Jerál no Tékniku Vokasionál, Domingos Lopes Lemos, hatete kazu ne’e sempre akontese iha eskola sira. Maibé kazu ne’e inspesaun jerál hala’o hela sira-nia servisu.
“Iha tinan ensinu sekundáriu kuaze ema atus ida mak la tuir ezame nasionál tanba falsifika diploma ida hanesan ne’e. Ne’ebé estudante balun to’o lakon tiha de’it, la tuir ezame tanba laiha diploma. Kazu ne’e sei kontinua prosesu hela”, dehan.
Notísia relevante: ME identifika estudante ida iha ESJ uza diploma falsu
Jornalista : Osória Marques
Editora : Rita Almeida
