ERMERA, 02 Abríl 2025 (TATOLI)—Diretora Nasionál Patrimóniu Lojístika no Infraestrutura Ministériu Juventude Desportu Arte no Kultura (MJDAK), Maria Luisa Monteiro, hateten iha tinan 2025 Governu tau ona orsamentu hodi halo manutensaun ba Estádiu tolu hanesan Maliana, Baucau no Gleno.
“Loos, ita-nia Estádiu tolu ne’e kondisaun komesa aat uitoan-uitoan ona, iha tinan ne’e Governu tau ona orsamentu atu halo manutensaun maibé ho montante ladun boot,” Diretora ne’e hateten ba Agência TATOLI iha Gleno, kuarta ne’e.
Nia dehan, kona-ba Estádiu tolu ne’e, tékniku sira husi MJDAK foti ona dadus no daudaun ne’e iha faze preparasaun ba dezeñu manutensaun nian.
“Ita-nia tékniku sira foti hotu ona dadus. Sira identifika buat sira-ne’ebé mak aat iha kada Estádiu agora iha faze prepara dezeñu Planta no Kadernu Enkargu (BoQ) hodi halo prosesu manutensaun ba ita-nia Estádiu tolu (3) mak Maliana, Baucau no Gleno,” nia dehan.
Nia hatutan, orsamentu ne’ebé Governu prepara ona atu halo manutensaun ba Estádiu (3) ne’e la boot liu rihun $50.
“Ita tau osan tuir levantamentu dadus, osan manutensaun nia la boot liu rihun $50, ba Estádiu tolu ne’e rihun $50 mai kraik,” nia dehan.
Daudaun ne’e, Estádiu Café Gleno nia kondisaun hahú aat iha parte plafon, bens ba jogadór sira, toilet no seluk tan.
Jornalista : Hortencio Sanchez
Editór : Cancio Ximenes
