Projetu konstrusaun Sentru PMOHA iha Malilait abandonadu

BOBONARU,09 Abríl 2025 (TATOLI)-Projetu Konstrusaun Sentru Komite Programa Movimentu Hafoun Aldeia (PMOHA) iha suku Malilait,postu administrativu Bobonaru, Munisípiu Bobonaru abandonadu tanba servisu fiziku paradu iha fulan Dezembru 2022 to’o ágora seidauk kontinua.

Obra ne’e nu’udar programa pilotu  PMOHA ne’ebé implementa husi Ministériu Administrasaun Estatál iha mandatu Governu da- ualu. Servisu Fiziku implementasaun obra ne’e atinje ona 45% liu no to’o ona faze preparasaun atu taka kalen ba uma-kakuluk.

Notísia Relevante:Programa Movimentu Hafoun Aldeia iha Bobonaro paradu

Ho situasaun ne’e, Xefe ekipa PMOHA Suku Mali-lait,Domingos Maia dos Santos, konfirma tuir kontratu implementasaun projetu ne’e ho durasaun fulan-tolu hahú husi loron 28 fulan-Outubru 2022 no ramata iha loron 28 fulan-Janeiru 2023, maibé la konsege finaliza tanba kestaun orsamentu.

“Ami halo planu detallu ba Ministeriu referidu, depois sira dehan hein rezultadu, nune’e ami lahatene tanba ami hein hela rezultadu atu halo levantamentu osan, maibé to’o agora seidauk iha desizaun husi Nasionál. Tuir loloos projetu ne’e la’o ho susesu tanba ninia orsamentu restu iha Banku ne’e sei iha $10.200,” nia informa ba Jornalista TATOLI,I.P iha terrenu, kuarta ne’e

Iha biban hanesan, Xefe suku Malilait,Valdemar Mario Vong de Jesus, husu ba Ministériu Kompetente atu foti desizaun hodi kontinua obra ne’e tanba orsamentu restu sei iha hela Banku.

“Ami nia haree programa sira ne’e di’ak atu dezenvolve ita nia suku no aldeia. Maibé projetu ne’e paradu no bele fó impaktu ida mai, nune’e ha’u hanesan Autoridade lokál sujere ba parte kompetente atu kontinua obra ne’e hodi bele finaliza, nia afirma.

Obra ho nia medida 9X6, kuarta rua kompletu ho Sintina ne’e tuir kontratu ho orsamentu rihun $20.

Programa PMOHA finansiá husi governu Koreia do Súl ne’ebé foku liu maka hadi’a ambiente, atividade produtivu hanesan ortikultura, pekuária no empreendorizmu iha nivél aldeia bazeia ba potensialidade neʼebé aldeia sira iha, nune’e bele hadi’a populasaun sira nia moris.

Programa PMOHA implementa husi lider komite aldeia ne’ebé forma husi komunidade iha nivel aldeia ho nian membru ema na’in-30, Programa referidu implementa husi Ministériu Administrasaun Estatál bazeia ba dekretu-lei nú 23/2021.

Notísia Relevante:Governu sei implementa PMOHA iha Dili-Bobonaro-Ermera-Baucau-Ainaro
Jornalista: Sergio da Cruz
Editór: Florencio Miranda Ximenes