BOBONARU, 17 Abríl 2025 (TATOLI) – Iha omília misa kinta-feira Santa nian, Bispu Dioseze Maliana, Dom Norberto do Amaral, husu sarani sira atu banati tuir domin ne’ebé Jesus hatudu mak hadomi malu, respeita, perdua no serbí malu, nune’e bele sai sarani ida ne’ebé di’ak no loos.
Dom Norberto hateten ohin tama ona iha loron importante tebes, ne’ebé hahú ho tridun paskál, ne’ebé selebra mistériu boot iha sarani sira nia-moris.
Notísia Relevante: Selebra Páskoa, “Moris pasiénsia tuir idaidak nia fiar”
“Ohin primeiru dia ita hahú ho atitude Jesus nian ne’ebé fó hatene mai ita no hatudu domin ba inan-aman, labarik no joven sira. Domin mak halo ita moris hamutuk to’o rohan, to’o ferik no katuas”, saserdote ne’e esplika bainhira prezide misa iha Igreja Maliana.
Bispu Norberto hatutan iha semana santa tridun paskál nian – kinta, sesta no sábadu, Jesus hatudu domin universál ba ema hotu liuhusi atitude importante tolu mak hanesan fase ain, harii eukaristia nomós harii saserdote.
Kona-ba fase ain, amu esplika katak Jesus hanesan Na’i no mestre boot, halo buat hotu ne’ebé halo ema hakfodak, tanba halo mate sira sai moris fali, ema moras hetan isin di’ak, ema matan-delek sira hetan di’ak fali.
Maibé iha momentu ida-ne’e Nia husik nia domin hodi tun bá fase apóstolu sira-nia ain, ne’ebé hatudu katak Nia haraik-aan no obidiénsia boot ba terus, ba Maromak nia planu.
“Maibé iha ita-nia moris ne’e hadomi ne’e susar loos, maibé Jesus hatudu ida-ne’e atu ita banati-tuir, atu ita serbí malu, loke neon ba malu, haree malu di’ak iha ita-nia familia, komunidade. Atu sai sarani ne’ebé loos tenke perdua-malu iha susar ruma nia-laran, nune’e iha maromak nia futar oin ida-ne’e mak Jesus hakarak hato’o iha fase ain. Se ha’u la fase ó-nia ain, ó la hola parte ho ha’u”, nia esplika.
Kona-ba eukaristia, Dom Norberto salienta katak eukaristia la hanesan asaun de grasa ida ne’ebé aas liu hotu-hotu, nune’e Jesus hasa’e nia-aan no fó nia-aan tomak ba ema hotu.
“Hau nia-isin ne’e ha’u-nia naran hodi hasa’e nu’udar sakrifísiu ne’ebé boot tebes no nia hakarak hatudu nia-aan, fó nia-aan tomak ba ema hotu. Ne’e Ha’u-nia isin, ne’e Hau-nia-raan, hotu-hotu han, hotu-hotu hemu, depois Ni’a hasa’e ba Aman Maromak”.
Kona-ba harii saserdote, Don Norberto haklaken katak halo de’it eukaristia nu’udar reprezentante Kristu nian “iha ita-nia leet hanesan Kristu rasik, nune’e nia bele selebra eukaristia hamutuk ho sarani sira”.
“Buat tolu ne’e importante tebes, forma ita atu sai unidade liuhusi buka atu serbí ba malu ho eukaristia ne’e atu fó kbiit mai ita nia-isin hodi la’o didi’ak iha mundu ida-ne’e ba oin tuir Maromak nia hakarak”, dehan.
Notísia Relevante :“Hametin fiar no esperansa”-Pe. Adam
Selebrasaun misa ne’e hetan seguransa másima husi Polisía Nasionál Timor-Leste (PNTL) no FALINTIL-Forsa Defeza Timor-Leste no hetan apoia asisténsia primeiru sokorru husi pesoál saúde husi Ospitál Referénsia Maliana.
Jornalista: Sérgio da Cruz
Editora: Maria Auxiliadora
