DILI, 28 Abríl 2025 (TATOLI)–Komandante Polísia Nasionál Timor-Leste (PNTL) munisípiu Dili, Superintendente Xefe Orlando Gomes, hateten durante misa funerál ba Papa Francisco iha Tasi-Tolu iha sábadu (26 Abríl 2025 ne’e, la rezista kazu krime no situasaun la’o kontroladu.
“Durante misa requiem ba ita-nia Sua Santidade Papa Francisco iha Tasi-Tolu ne’ebé hala’o iha tuku 18h00, hahú misa to’o ramata siauasaun hotu la’o di’ak no ita la rejista kazu krime ruma,” Komandante Orlando hateten ba jornalista sira iha Komandu PNTL Munisípiu Dili, segunda ne’e.
Durante misa hetan seguransa másimu husi PNTL liuhusi Unidade Polísia Maritima (UPM), Unidade Espesiál Polísia (UEP), Unidade Patrollamentu Fronteira (UPF) no koopera hamutuk ho FALINTIL-Forsa Defeza Timor-Leste (F-FDTL).
“Ita-nia unidade sira iha PNTL hamutuk ho ita-nia F-FDTL sira koopera malu di’ak tebes ne’e mak garante duni seguransa ne’ebé di’ak,” nia tenik.
Tanba ne’e, nia apresia ba komunidade hotu liuliu joven sira-ne’ebé kontribui makaas ba estabilidade durante misa funerál Sua Santidade Papa Francisco nian.
“Situasaun la’o di’ak tanba kontribui makaas mós husi ita-nia sarani sira, liuliu joven sira. Maske iha misa ne’e ema barak tebes maibé laiha konflitu ruma. Maibé misa sai iha parte kalan mak iha engrafamentu uitoan maibé ita-nia PNTL rezolve tiha transporte públiku sira la’o normál hikas,” nia hateten.
Jornalista : Hortencio Sanchez
Rditór : Cancio Ximenes
