OEKUSI, 30 Abríl 2025 (TATOLI) – Primeiru-Ministru, Kay Rala Xanana Gusmão, husu ba intelektuál sira Oekusi-oan atu hamutuk hodi dezenvolve rai-ketan ne’e.
Xefe Governu hato’o iha ámbitu diálogu ho populasaun iha sub-rejiaun Oésilo, bainhira abitante sira husu kona-ba fó podér ba Oekusi-oan atu lidera Rejiaun Administrativa Espesiál Oekusi Ambeno (RAEOA) no Zona Espesiál Ekonomia Sosiál Merkadu Oekusi Ambenu (ZEEDOA), tanba sira iha ona matenek barak.
“Kuandu imi hatene, imi bolu malu matenek Oekusi-oan sira, ko’alia kona-ba oinsá mak partisipa iha prosesu dezenvolvimentu atu dezenvolve Oekusi. Iha Dili karik haree sira-nia serbisu ladún di’ak, labele bolu mai, kuandu serbisu di’ak bolu mai iha Oekusi”, xefe Governu dehan.
Nia hatutan iha asembleia munisipál sei deside ema balun atu tama hodi fiskaliza projetu sira-ne’ebé Govenu lokál halo, tenke hatene korrije no iha kapasidade di’ik.
“Agora ne’e, ha’u haree povu Oekusi kontente tanba oan sira iha matenek barak ona, maibé labele kontente uluk. Kuandu imi-nia oan sira serbisu di’ak, bá haku’ak sira, dehan ami hadomi tanba imi-nia matenek hodi serbisu sai di’ak. Ida-ne’e mak imi kontente, gaba oan sira, tanba Oekusi-oan sira matenek”, xefe Governu dehan.
Iha diálogu ne’e, abitante Ricardo Sufa husu ba primeiru-ministru katak antes ne’e autoridade RAEOA lidera husi Oekusi-oan, maibé daudaun nomeia husi Dili.
“Ami Oekusi-oan mós iha ema matenek atu ko’alia kona-ba Atoni-Oekusi, [maibé] nomeia ema seluk mai, ezonera fali Oekusi-oan sira, liuliu Sekretária Rejionál Finansa, entaun oinsá kona-ba jestaun ba orsamentu, ida-ne’e mak ami preokupa”, Ricardo Sufa lamenta iha ámbitu diálogu ne’ebé hala’o iha Tumin, ohin.
Iha biban ne’e, António Sufa mós kontente ho primeiru-ministru nia prezensa iha komunidade sira-nia leet hodi ko’alia sai kona-ba problema ne’ebé durante ne’e akontese iha administrasaun Oekusi.
“Ami apresia tanba primeiru-ministru mai ko’alia direta ho ami, ami hato’o saida mak durante ne’e ami sente no enfrenta. Ne’e oportunidade di’ak, maibé ami husu de’it ba primeiru-ministru atu orienta Prezidente Autoridade hodi hatama fali Sekretária Finansa hodi serbisu, inklui Oekusi-oan ne’ebé nia hasai ona ne’e”, nia hato’o.
Notísia relevante: Abitante suku tolu iha Oésilo partisipa másima iha diálogu ho Primeiru-Ministru
Feliciano Maunu husi aldeia Quibiselo, suku Bobometo, reforsa katak Oekusi-oan preparadu atu lidera rasik nia rai, tanba durante ne’e hetan diskriminasaun iha administrasaun RAEOA.
“Ha’u hakarak relata ami iha rekursu umanu, lisensiatura barak, mestradu, doutoramentu, eis titulár, durante ne’e ami observa ami-nia oan sira diskrimina hodi tau sira iha klaran de’it, la’ós iha kotuk ka oin. Tan ne’e, ami orgullu ho prezensa maun boot, ami husu tempu ona fihir no hili ami-nia oan sira, promove ona sira atu lidera ami-nia rai. Ami lakohi ona ema mai ukun ami. Ida-ne’e mak hato’o ho fuan no laran ba maun boot atu tetu no deside”, nia husu.
Notísia relevante: Komunidade Pássabe prefere Primeiru-Ministru hili Oekusi-oan lidera RAEOA-ZEEDOA
Jornalista: Abílio Elo Nini
Editora: Maria Auxiliadora
