DILI, 07 Maiu 2025 (TATOLI)-Maria Lúcia Aparício ho tinan 19 nu’udar estudante eskola portugés Dili sai vensedora ba Prémiu XI Lian Portugés, ho títulu ba testu “A viagem”.
Testu aborda ninia viajen hosi Dili bá Portugál durante fulan ida no konta kona-ba ninia viajen no adaptasaun ba ambiente foun ida.
Maria Aparício realsa kompetisaun ne’e importante tebes tanba fó oportunidade ba estudante timoroan sira atu hadi’a sira-nia hakerek no hanoin krítiku.
“Ha’u hanoin ida-ne’e importante, tanba promove lian-portugés no estudante timoroan sira iha oportunidade atu hadi’a sira-nia hakerek, la’ós de’it iha nível gramatikál, maibé mós iha nível kreativu”, dehan vensedora ne’e iha Fundasaun Oriente, ohin.
Nia hatutan: “Ha’u hein katak iha futuru joven timoroan barak liután sei partisipa iha tipu kompetisaun ida-ne’e, tanba ne’e presiza kontinua”.
Delegada hosi Fundasaun Oriente iha Timor-Leste, Joana Saraiva, hatete ideia ne’e hakarak promove lian-portugés iha ambiente la’ós formál ida ne’ebé bele espresa-aan ho forma ida ne’ebé livre liu no kriativu liu.
“Testu kreativu ne’ebé furak, linguajen no testu mai ho kualidade barak no ho istória, no ida-ne’e rekompensativu tebes no nia hanoin katak ba sira ne’ebé partisipa ida-ne’e mós interesante tebes”, Saraiva dehan.
Reprezentante Ministériu Ensinu Superiór, Siénsia no Kultura (MESCC), Diretora Jerál, Maria Filomena Lay Guterres, afirma ministériu fó apoiu tomak ba tipu inisiativa sira hosi kompetisaun no hanesan sinál klaru ida hosi kreximentu hosi interese no entuziazmu hosi joven timoroan sira ba lian-portugés.
“Eventu ne’e fó sinál klaru kona-ba kresimentu interese no entuziazmu husi ita-nia joven timoroan sira ba lian-portugés, no tenke selebra nu’udar sinál entuziazmu no konfiansa ba futuru lian ida-ne’e nian iha Timor-Leste”, nia dehan.
Diretora Jerál hatutan: “Ideia maka atu fó oportunidade fahe uzu lian-portugés iha ambiente naun-formál iha ambiente espresaun ne’ebé livre no kriativu liu, no sai interesante tebes atu haree kresimentu no kresimentu iha númeru partisipante. Tinan tolu ikus ne’e, ami sempre mantein liu partisipante na’in-60, ne’ebé barak tebes konsidera katak ida-ne’e hanesan dezafiu ida iha lian barak ne’ebé konsidera nafatin difísil”.
Kompetisaun tinan ida-ne’e partisipante hamutuk na’in 62, primeru lugár sei tuir kursu lingua no kultura portuguesa iha universidade Portugal. Iha 2º lugar mak Pascoal do Reis Soares ho istória no iha 3º lugar mak Nuno Seixas de Oliveira. Manan na’in ba 2º no 3º lugar hetan premiu US$500 no US$300.
Notísia relevante: PPN destaka importánsia lian portugés nu’udar janela ba mundu
Jornalista : Osória Marques
Editora : Rita Almeida
