VIKEKE, 14 Maiu 2025 (TATOLI)—Ekipa Sekretáriu Estadu Dezemvolvimentu Lokál (SEDL), kuarta ne’e, senscibiliza diploma ministeriál númeru 72/2024, 11 Dezembru, kona-ba prosedimentu ba formulasaun no aprovasaun planu munisipál, ba autoridade lokál no diretór sira iha munisípiu Vikeke.
Diretór jerál Sekretáriu Estadu Dezemvolvimentu Lokál (SEDL), Vírgílio da Costa, esplika Ministeriu Administrasaun Estatal (MAE) halo dekretu diploma ministeriál ne’e kona-ba prosedimentu ba formulasaun no aprovasaun ba Planu Asaun Dezenvolvimentu Munisipál ne’e, Governu anteriór iha ona planu estratéjiku munisipál maibé iha momentu ne’eba seidauk iha baze legal husi tinan 2019 to’o 2023.
“Ita konsege prodús maibé iha implementasaun mak seidauk la’o di’ak. Tan ne’e, hamosu diploma ministeriál ida-ne’e hodi fó kbiit, oinsá iha tempu oin mai ita bele iha planu mestre ida ne’ebé guia ita hodi implementa planu asaun anuál sira ho di’ak, hodi ita bele dezenvolve ita-nia munisípiu Vikeke,” Virgílio da Costa hateten iha salaun administrasaun Vikeke, ohin.
Sensibilizasaun ba diploma ministeriál ida-ne’e atu autoridade no diretór sira bele iha koñesementu ba implementasaun diploma referida.
“Ita atu asegura kompromisiuGovernu Konstitusionál da-sia (IX) ba ezekusaun polítika dezentralizasaun administrasaun poder lokál. Ho ida-ne’e ita-nia kompromisu ba tinan 2025 to’o 2030 bele finaliza planu estratejiku durasaun tinan lima. Kada tinan ita halo planu anuál ne’ebé tenke bazeia ba planu mestri sira-ne’ebé ita iha,” nia dehan,
Dezenvolvimentu iha munisípiu la’o di’ak, presiza reforsa governasaun lokál ida-ne’ebé di’ak no planu dezenvolvimentu munisipál ida-ne’ebé di’ak.
Sekretáriu munisipál asuntu Finansa, José da Costa de Sousa, hateten sensibilizasaun ba diploma miniteriál sai importante ba autoridade sira iha munisípiu Vikeke komprende no implementa hodi labele ses husi diploma referida.
“Nune’e, diploma ida-ne’e regula ita hodi hala’o ita-nia dezenvolvimentu iha munisípiu Vikeke. Tan ne’e, ha’u husu ba diretór no autopridade sira bele partsipa ho di’ak, atu bele komprende kle’an ba konteudu diloma ministeriál nú. 72/2024 ne’e,” nia hateten.
Partisipa iha atividade sensibilizasaun ne’e husi administrdór postu sira, diretór munisipál, territoriál, xefe departamentu no funsionáriu sira iha munisípiu Vikeke.
Jornalista : Vitorino Lopes da Costa
Editór : Cancio Ximenes
