PR Horta hato’o sentidu konolénsia ba falesimentu antigu Prezidente Uruguai

DILI, 15 Maiu 2025 (TATOLI)—Prezidente Repúblika, José Ramos Horta, hato’o sentidu kondolénsia profunda ba Governu no povu Uruguai ba falesimentu antigu Prezidente Republika Orientál Uruguai, José Alberto “Pepe” Mujica.

Mujica figura ikóniku iha istória polítika Amérika Latina no mundiál ne’ebé ninia moris no legadu kontinua fó inspirasaun ba ema rihun ba rihun.

Iha karta formál kondolénsia nian ne’ebé dirije ba Yamandú Orsi, Prezidente Repúblika Orientál Uruguai nian, iha loron 14 fulan-Maiu tinan 2025, Prezidente Ramos Horta hato’o nia sentidu kondolénsia no solidariedade ba Povu Uruguai no Prezidente Mujica nia família enlutada iha momentu triste no lutu nasionál ida-ne’e.

Prezidente Ramos Horta fó onra ba legadu notável Prezidente Mujica nian, hodi dehan: “Mane ida-ne’ebé iha konviksaun metin no líder ho korajen admirável, José Mujica nia viajen istória nu’udár símbolu rezisténsia, simplisidade no umanizmu nian”.

Ninia dalan Horta afirma, husi luta revolusionáriu no prizaun brutál to’o kargu aas liu Estadu nian reflete moris ida-ne’ebé dedika ba justisa sosiál, demokrasia no dignidade umana.

Ninia rejeisaun ba luxu no ostentasaun, ninia moris simples iha área rurál, no ninia kompromisu ba ema vulnerável sira halo nia sai hanesan ema Republikanu ne’ebé loos, ezemplu raru ba koerénsia entre liafuan no hahalok.

Prezidente Ramos Horta mós nota katak iha lideransa Mujica nian, Uruguai asume papél pioneru ida iha promosaun direitu sivíl, liberdade individuál no polítika públika progresiva, hodi hetan respeitu no admirasaun iha mundu tomak.

Xefe Estadu ne’e hatutan, Mujica nia lian kalma maibé metin sei kontinua moris hanesan sinál klaridade, umildade no esperansa ba jerasaun futuru.

Antes remata, Prezidente José Ramos Horta espresa nia esperansa katak memória husi Prezidente Mujica sei kontinua orienta Uruguai no Amérika Latina tomak iha sira-nia dalan ba sosiedade ne’ebé justu, kompaixaun no livre liu.

TATOLI