Empreza 15 Realite sei entrega Jináziu Dili ba Governu
DILI, 16 maiu 2025 (TATOLI)–Ministru Juventude, Desportu, Arte no Kultura (MJDAK), Nelyo Isaac Sarmento, hateten empreza 15 Realite Unipesoál, Lda, ne’ebé halo reabilitasaun ba Jináziu Dili sei konklui no entrega ba Governu hodi prepara ba jogu Komunidade Nasaun Ko’alia Lian Portugés (CPLP-sigla portugés) ne’ebé sei realiza hahú husi 17-27 Jullu 2025.
Notísia Relevante: Empreza 15 Realite hahú reabilita Jináziu Dili ba preparasaun jogu CPLP
“Jináziu Dili kompaiñia halo hela reabilitasaun, iha fulan-Juñu nia rohan sira finaliza no entrega ona mai Governu. Agora, empreza halo servisu di’ak tebes,” Ministru Nelyo hateten ba Agência TATOLI iha edifisiu MJDAK Lesidere Dili, ohin.
Nia dehan, empreza sira iha vontade tebes atu hodi halo projetu sira-ne’e no Governu fiar sei entrega tuir tempu ne’ebé determina ona.
“Jogu CPLP ita bele utiliza fatin sira-ne’e ho di’ak liuliu Jináziu Dili, Voleiból Praia no kampu tenis iha Universidade Nasionál Timor-Lorosa’e (UNTL),” nia dehan.
Reabilitasaun Jináziu Dili empreza troka zinku iha uma nia kakuluk, troka simentu sira iha uma laran, monta Sound System, monta lampu foun no seluk tan.
Dadaun ne’e, empreza 15 Realite Unipesiál, Lda, mak halo hela reabilitasaun ba Jináziu Dili. Kona-ba orsamentu sei iha faze verefika husi Ajénsia Dezenvolvimentu Nasionál (ADN) maibé reabilitasaun ba Jináziu Dili daudaun ne’e besik atinje ona 50%.
Jogu CPLP tinan ida-ne’e sei hetan partisipasaun másimu hosi Estadu-membru sira, ho delegasaun hanesan, Angola ho partisipante 101, Brazil 101, Cabo Verde 101, Guiné Bissau 61, Guiné Eqotoriál 35, Mosambike 70, Portugál 101, São Tomé e Prínsipe 35 no Timor-Leste ho partisipante hamutuk 101.
Eventu importante ida-ne’e hatudu Timor-Leste nia kompromisu atu haburas interkámbiu kulturál no atlétiku iha komunidade CPLP nia laran.
Jornalista : Hortencio Sanchez
Editór : Cancio Ximenes
