PM Xanana: Governu sei foti desizaun taka totál atividade GAM
DILI, 22 Maiu 2025 (TATOLI)—Primeiru-Ministru (PM), Kay Rala Xanana Gusmão, hateten kontente ho selebrasaun aniversáriu loron nasionál restaurasaun independénsia 20 de Maiu ba da-23, maibé iha joven balun husi Grupu Arte Marsiál (GAM) sei halo konflitu, nune’e Governu sei haree hodi foti desziaun atu taka totál atividade Arte Marsiál.
Notísia Relevante: Governu sei prepara lei própriu ida regula grupu arte marsiál
“Ita kontente tanba selebrasaun tinan 23 ba restaurasaun independénsia buat hotu la’o di’ak, apezar iha violénsia uitoan, haree ba haree mai afinál buat ne’e iha problema uitoan ho Arte Marsiál nafatin. Ne’ebé, ha’u informa ba Prezidente Repúblika katak Governu sei toma pozisaun ida hodi taka tiha Arte Marsiál ne’ebé estraga nafatin labarik sira,” Xefe Governu ne’e hateten ba jornalista sira hafoin remata enkontru ho Xefe Estadu iha Palásiu Prezidensiál Nicolau Lobato, Bairru Pite, kinta ne’e.
Governu hato’o pozisaun ne’e tanba iha loron 20 fulan-Maiu akontese konflitu entre joven sira iha postu administrativu Kailaku, munisípiu Bobonaro hodi rezulta joven ida lakon vida, tanba husi konflitu ne’e deskonfia envolve husi membru sira Arte Marsiál balun iha fatin referidu.
“Ami sei haree hamutuk iha Konsellu Ministru hodi taka ona tanba buat ne’e mak fahe joven sira. Ezemplu ha’u ho ha’u nia primu, se nia PSHT, ha’u 77 ami fahe malu ona tanba diferensa,” Xanana hateten.
Aleinde ne’e, PM Xanana apresiza ba komunidade husi parte seluk ne’ebé kontribui tebes ba pás hodi selebra loron restaurasaun independesia la’o ho susesu.
“Apresia tebes ba komunidade tomak kontribui tebes ba selebrasaun tinan 23 restaurasaun independénsia ne’e, liuliu ba komunidade sira iha Dili durante loron lima (5) no kalam lima (5) iha Portu Dili selebra loron restaurasaun ne’e ho estabilidade, kapaas tebes, ema la book malu, ema la estraga malu,” Xanana tenik.
Antes ne’e, iha loron 02 fulan-Abril 2025 Projetu Rezolusaun Governu hetan aprovasaun iha Konsellu Ministru, ne’ebé estende, to’o loron 31 dezembru, suspensaun ba ensinu, aprendizajen no prátika arte marsiál, nune’e mós taka fatin no instalasaun hotu-hotu ne’ebé destina ba objetivu ne’e. Proposta ne’e aprezenta husi Primeiru Ministru, Xanana Gusmão.
Tuir fonte Governu nian, medida ne’e tuir husi Rezolusaun Ezekutivu Nú. 45/2023, husi loron 10 fulan-Novembru, ne’ebé prolonga ona husi Rezolusaun sira Governu nian númeru 17/2024, husi loron 24 fulan-Abril, no númeru 60/2024, husi loron 07 fulan-Novembru.
Mantein nafatin razaun sira-ne’ebé mak motiva suspensaun husi ensinu, aprendizajen no prátika arte marsiál sira-nian no mós enserramentu husi respetivu espasu sira.
Medida ne’e kontinua konsidera nesesáriu hodi konsolida dame sosiál ne’ebé hetan ona dezde fulan-Novembru 2023 no hodi garante katak, iha futuru, prátika arte marsiál sira akontese eskluzivamente iha ambiente sira desportu nian, ne’ebé promove valór sira dixiplina, sivilizasaun no formasaun umanístika entre joven sira.
Sentidu ne’e, justifika ona estensaun hosi suspensaun no enserramentu temporáriu husi instalasaun sira-ne’ebé asosiadu ho atividade sira-ne’e.
Notísia Relevante: PNTL hahú investiga kazu konfrontu Kailaku ne’ebé hakotu Ronaldinho nia moris
Jornalista : Hortencio Sanchez
Editór : Cancio Ximenes
