DILI, 03 Abríl 2025 (TATOLI)–Primeiru-Ministru (PM), Kay Rala Xanana Gusmão, hateten Governu sei prepara lei própriu ida haruka ba Parlamentu Nasionál halo diskusaun no aprova hodi regula grupu arte marsiál sira.
Notísia Relevante: Governu kontinua suspende prátika arte marsiál to’o Dezembru
“Kona-ba arte marsiál atu halo lei ida, lei baze atu haruka ba Parlamentu Nasionál, maibé agora daudaun Parlamentu Lei barak demais, ne’ebé ami dehan hein lai,” Xefe Governu ne’e hateten ba jornalista sira iha Palásiu Prezidensiál Nicolau Lobato, Bairru Pite, kinta ne’e.
Tanba ne’e, Governu kontinua foti desizaun iha Konsellu Ministru hodi estende no aprova projetu Rezolusaun Governu, ne’ebé sei prolonga to’o loron 31 fulan-Dezembru tinan 2025, suspensaun ba ensinu, aprendizajen no prátika artes marsiál no taka temporáriu ba fatin no instalasaun hotu-hotu ne’ebe destinadu ba ensinu, aprendizajen no prátika artes marsiál.
Medida ida-ne’e fó kontinuasaun ba Rezolusaun Governu nú. 45/2023, loron 10 fulan-Novembru, ne’ebé mak prolonga ona hosi Rezolusaun Governu nú. 17/2024, loron 24 fulan-Abríl no nú. 60/2024, loron 7 fulan-Novembru.
Razaun sira-ne’ebé motiva suspensaun ba ensinu, aprendizajen no prátikas arte marsiál no halo enserramentu ba ninia espasu sira, mantein nafatin.
Medida ne’e kontinua konsidera nesesáriu hodi hametin pás sosiál ne’ebé hetan dezde fulan-Novembru tinan 2023 no asegura katak iha futuru, prátika arte marsiál akontese de’it iha ámbitu desportivu, hodi promove valór dixiplina, sivizmu no formasaun umanista entre joven sira.
Ida-ne’e mak sai justifikasaun hodi estende suspensaun no enserramentu temporáriu ba instalasaun sira-ne’ebé relasiona ho atividade sira-ne’e.
“Ita bandu nafatin sira labele hala’o atividade, labele halo rekrutamentu. Importante mak nasaun ne’e hakmatek laiha violénsia hanesan uluk. Maibé sei mosu nafatin iha fatin balun, ida-ne’e mak ita suspende nafatin sira-nia atividade,” Xanana tenik.
Xanana esplika, razaun suspende atividade arte marsiál to’o 31 Dezembru 2025 tanba iha tinan ida-ne’e Timor-Leste sei komemora tinan 50 proklamasaun independénsia.
“Ita suspende kedan sira-nia atividade to’o 31 Dezembru 2025 tanba 28 Novembru 2025 Timor-Leste sei selebra tinan 50 proklamasaun independénsia, ida-ne’e para ema hotu hakmatek hodi selebra loron importante ne’e,” Xanana dehan.
Notísia Relevante: Governu analiza didi’ak molok deside taka atividade grupu arte marsiál-rituál
Jornalista : Hortencio Sanchez
Editór : Cancio Ximenes
