Jerasaun Patriota destaka pontu importante tolu iha nia aniversáriu
DILI, 23 Maiu 2025 (TATOLI) – Asosiasaun Jerasaun Patriota destaka pontu importante tolu iha nia aniversáriu ba da-X liuhusi reflesaun no semináriu ho tema sentrál “Momentu Istóriku Tinan-X Ezisténsia Jerasaun Patriota: Husi Pasadu ba Futuru”.
Pontu importante sira ne’e mak hanesan: 1) Dezenvolvimentu Timor-Leste – progresu, dezafiu no oportunidade ba futuru di’ak liu; 2) Kontestu jeopolítika no nia influénsia ba Timor-Leste nia seguransa no dezenvolvimentu sosio-ekonómiku; no, 3) Papél jerasaun patriota nian iha prosesu harii pás no dezenvolvimentu.
“Liuhusi atividade hirak-ne’e, bele lori perspetiva foun, hamosu ideia kriativa hodi ajuda Jerasaun Patriota hakat ho maduru iha prosesu dezenvolvimentu Timor-Leste,” sita komunikadu imprensa Asosiasaun Jerasaun Patriota, TATOLI asesu, ohin.
Notísia relevante:Jerasaun Patriota iha esperansa veteranu sira bele iha unidade
Selebrasaun anivesáriu ba dala-X iha tinan-2025 ne’e, tuir Asosiasaun Jerasaun Patriota, hanesan momentu istóríku tanba liu-tiha tinan-sanulu movimentu ne’e legalmente hamriik nu’udar organizasaun ida tuir lei ne’ebé vigora iha Estadu Timor-Leste no rekoñese hanesan asosiasaun ne’ebé halibur funu-na’in hotu sira-nia oan.
Nune’e, jerasaun patriota hanesan movimentu sosiál ne’ebé eziste iha loron 20 fulan-Maiu 2015 no transforma ba asosiasaun iha fulan-Maiu tinan-2025, liuhusi sertidaun firma ne’ebé emite hosi Diresaun Nasional Rejistu Notariadu.
No, loron ohin realiza atividade reflesaun hodi relembra memória husi organizasaun nian ne’ebé hanesan movimentu no prepara hodi hakat ba natureza assosiasaun.
Entretantu, tinan ida-ne’e, Jerasaun patriotia, halo atividade durante loron rua, hahú iha 23 to’o 24 Maiu 2025.
Loron daruak sei kontinua ho misa agradesementu hafoin kari ai-funan iha estátua Prezidente Nicolao Lobato, no sei kontinua ho programa komemorasaun nian iha Quarter Jeral F-FDTL Fatuhada Dili.
Entretantu atividade ne’e hetan partisipasaun husi membru patriota, lideransa komunitária, F-FDTL.
Jornalista: Alexandra da Costa
Editór: Rafael Ximenes de A. Belo
