ME planeia koloka tán manorin 187 ba ensinu báziku
DILI, 03 Juñu 2025 (TATOLI)-Diretór Nasionál Rekursu Umanu iha Ministériu Edukasaun (ME), João Amaral, informa ME planeia tán atu koloka manorin 187 ba ensinu báziku iha territóriu.
Responsável ne’e hatutan manorin ne’ebé hela iha bolsa kandidatu ensinu báziku primeiru siklu no segundu siklu, ne’ebé ho valór hosi 65 mai 63.
“Ita-nia bolsa kandidatu ne’ebé iha hela bolsa ne’e hamutuk 1.090. Ita presiza tán na’in 187, ne’ebé sei koloka tuir nesesidade eskola nian. Ne’ebé manorin iha bolsa kandidatu hela 903 maibé ida-ne’e ita sei koloka fazeadamente”, nia dehan ba TATOLI iha nia knaar fatin Vila Verde, tersa-ne’e.
Nune’e ohin to’o 13 fulan-Juñu ne’e, Ministériu Edukasaun husu bolsa kandidatu faze daruak grupu rekrutamentu siklu 1 no 2 ensinu báziku atu submete dokumentu hodi prosesa.
Bazeia ba despasu omologu Ministra Edukasaun ho númeru 044/GMME/VIII/2024, loron 23 agostu 2024 ne’ebé aprova bolsa kandidatu ba grupu rekrutamentu primeiru siklu no segundu siklu ensinu báziku ho kandidatu 2441. Bazeia ba despasu ministra númeru 5/2025 loron 13 Fevereiru 2025 ne’ebé aprova atualizasaun lista finál integrasaun bolsa kandidatu ho totál hamutuk 1.296.
Nune’e Diresaun Nasional Rekursu Umanu aviza ba kandidatu sira ho númeru seriasaun 8, 72, 103, 110, 117, 130, 133, 140, 145, 156, 179, 183, 185, 187, 190, 199, 200 no hosi númeru seriasaun 225 até 394, ne’ebé inklui hosi pontuasaun 65, 64 no 63.
Husu ba kandidatu sira ne’ebé naran mensiona iha lista ne’ebé inklui iha avizu ne’e atu komprova no kompleta dokumentu rekezitu sira molok hakat ba etapa sira tuir mai. Dokumentu sira mak billete identidade, kartaun eleitorál, sertidaun moris, rejistu kriminál ne’ebé válidu, atestadu médiku husi Ospitál Nasionál Guido Valadares, diploma mínimu baxarelatu (legaliza hosi Ministériu Ensinu Superiór, Siénsia no Kultura) no konta bankária no númeru IBAN.
Submisaun dokumentu sira ne’e ho versaun fíziku (hard copy) no koloridu. Fatin submisun dokumentu mak iha INFORDEPE, Dili, Timor-Leste
Notísia relevante: ME planea xamada bolsa kandidatu profesór 150-resin iha fulan-Maiu
Jornalista : Osória Marques
Editora : Rita Almeida
