OEKUSI, 11 Juñu (TATOLI) – Komando FALINTIL- Forsa Defeza Timor-Leste (F-FDTL) komponente Navál destakadu iha Rejiaun Administrativa Espesiál Oekusi Ambeno (RAEOA), kuarta ohin, translada ona mate-isin membru F-FDTL, Reinaldo Ximenes bá Dili liuhusi transporte marítima ho ró Berlin Ramelau iha tuku 18:30.
Ofisiál Ligasaun Fujiléiru Postu Destakadu RAEOA, Domingos de Jesus José, informa katak mate-isin membru ne’e sei to’o Dili iha loron kinta, dadersan, hafoin sei kontinua prosesu omanajén ikus iha komando F-FDTL mak kontinua bá seremónia funerál.
Notísia relevante:Breaking News: Membru F-FDTL ida mate ho mistériu iha Oekusi
“Ohin husi postu Oekusi nian, mai entrega de’it iha ró atu lori ba Dili, depois seremónia tuir mai, ami-nia komandante sira husi Komponente Navál sei hala’o, Ami-nia misaun mai entrega de’it iha ne’e to’o Portu Dili iha aban dadersan,” nia dehan ba jornalista sira iha portu Iwao Kitahara Mahata Oekusi, ohin.
Nu’udar Komandante komponente Navál destakadu Oekusi, hato’o agradese ba povu Oekusi no komandu PNTL Oekusi tanba bele apoia atu transporta matebian to’o portu Mahata.
“Obrigadu, nu’udar família, maluk no nu’udar kolega sira-ne’ebé iha Oekusi, akompaña ona matebian to’o iha Portu, ami hato’o obrigadu barak mós ba ekipa husi PNTL tanba bele apoia durante ne’e, to’o ohin, ne’ebé husi komandu deside membru na’in-neen mak akompaña matebian ba to’o nasionál,” nia agradese.
Notísia relevante:Komodoro Higinio Neves klarifika membru F-FDTL Reinaldo Ximenes mate tanba tiru-aan
Notísia relevante:Komandu F-FDTL sei investiga motivu membru Reinaldo Ximenes mate iha Oekusi
Jornalista: Abílio Elo Nini
Editór: Florencio Miranda Ximenes
