BOBONARU, 24 Juñu 2025 (TATOLI)—Governu liuhusi Ministériu Agrikultura, Pekuária, Peskas no Floresta (MAPPF) normaliza ka hasai ona sedimentasaun iha irrigasaun Halekou hodi fornese ba natar hamutuk ektare 400 iha aldeia Halekou, suku Ritabou, postu administrativu Maliana, inklui natar balun iha suku Hataz, postu administrativu Atabae, munisípiu Bobonaru.
Notísia Relevante: Natar ektare rihun 13-resin iha Maliana abandona
Atu bee ne’e suli tuir nia dalan ho loloos, lia-na’in sira hamutuk ho xefe suku-xefe aldeia no komunidade realiza serimónia kulturál dada-bee ne’ebé kada tinan sempre halo, hodi husu lisensa ba bei-ala sira molok halo atividade halai-natar epoka dahuluk tinan 2025.
Xefe aldeia Halekou, Domingos Mau Leto, reprezenta komunidade hato’o agradesementu ba Governu liuhusi MAPPF no Diresaun Servisu Munisipál Agrikultura Munisípiu Bobonaru, tanba apoia ona ekipamentu pezadu hodi normaliza irrigasaun ne’ebé rai taka-metin hafoin udan foin lalais ne’e.
“Servisu ne’e todan tanba mota ida Bebai ne’e nia ukun-aan la halo tuir ita-nia hakarak. Ne’e, ami komunidade tau estaka, servisu hamutuk ho ekipamentu pezadu ne’e fulan ida agora hotu ona. Ho Governu nia apoia hanesan mákina no mina Bidon 12 mak ohin loron bee sa’e ona ba irrigasaun Halekou. Ohin loron, ami halo kultura dada-bee, hahú aban ba oin, ha’u-nia komunidade lori Tratór tama para sira bele halo natar no mós to’os hamutuk ektare 400-resin,” nia informa ba jornalista sira iha natar Aibouk
Xefe aldeia ne’e rekomenda ba Governu liuliu MAPPF atu kontinua tau matan ba irrigasaun ne’e hodi fasilita komunidade halai natar kada tinan ho di’ak.
“Povu Halekou maioria ema agrikultór, natar mak luan tun ba ne’e balu kuaze ektare 200 hanesan abandona tanba kestaun bee mak la to’o. Povu hakarak prodús sasán hotu-hotu liuliu hare, maibé kestaun mak bee. Maibé, ami povu nafatin badinas atu prodús tanba ami-nia edifísiu mak to’os ho natar ne’e. Tanba to’os-na’in laiha ne’e hahan laiha. Bainhira ita ko’alia buat hotu, kabun laran mamuk, ita labele halo buat ida,” nia hateten.
Xefe suku Ritabou, Maximiano dos Santos Araújo, konfirma kada tinan komunidade Halekou sempre halo natar ka halai natar iha tempu bai-loro tanba tempu udan irrigasaun intupidu husi sedimentasaun.
“Irrigasaun ne’e fornese bee mai husi mota Bebai Nunura, entaun sei udan hela labele halo natar tanba mota ne’e araska uituan ita atu lori bee mai iha ne’e. Maibé, hahú aban, sira komesa fila rai ona tanba ita Ministériu Agrikultura normaliza ona irrigasaun. Espera katak, fulan-Jullu ho Agostu ne’e ita sei halo atividade iha ne’e,” nia hateten.
Tuir dadus ne’ebé Tatoli rekolla iha terrenu katak natar iha aldeia Halekou hamutuk ektare 600, maibé husi númeru ne’e natar hamutuk ektare 400 mak funsiona no natar ektare 200 mak daudaun ne’e abandonadu.
Notísia Relevante: PAM Bobonaro distribui “Hand Tractor” ba grupu agrikultór iha Maliana
Jornalista : Sergio da Cruz
Editór : Cancio Ximenes
