BOBONARO, 24 janeiru 2025 (TATOLI)—Prezidente Autoridade Munisípiu (PAM) Bobonaro, Alexandre Pires, sesta ne’e, distribui Hand Tractor sia (9) ba grupu agrikultór sira husi suku Lahomea, Ritabou, Raifun, Odomau no suku Tapo-Memo, iha postu administrativu Maliana, munisípiu Bobonaro.
Notísia Relevante: MAPPF distribui makina agrikola ba grupu HAPAS 23 iha Bobonaro
“Husu ba grupu benifisiáriu sira badinas servisu, tanba Governu prepara ona merkadu atu sosa produtu lokál. Osan Merenda eskola millaun $2 fó ba ita Bobonaro, imi prodús ha’u sei ko’alia ho Diretór Edukasaun, imi halo kontratu Ekipa Jestaun Programa (EJP), imi mak hatama sasán, atu nune’e osan ne’e sirkula de’it iha ita-nia rai-laran. Se lae, xineza sira foti sai hotu ba sira-nia rai,” Nia hateten ba benefisiáriu sira antes entrega Hand Tractor, iha salaun administrasaun postu Maliana.
Diretór Servisu Agrikultura Munisípiu Bobonaro, Longuinhos Joao, Hand Tractor ne’e Governu oferese ba grupu agrikultór sira, oinsá atu fasilita agrikultór sira hasa’e produsaun agrikola, tanba husu atu labele faan no utiliza mákina ne’e ba negósiu.
“Ita hakarak ema na’in-10 prontu, sira iha direitu hotu atu uza sasán ne’e, karik la to’o halo jestaun. Ami mós halo akordu atu nune’e uza sasán ne’e tuir nia regra. Se la tuir regra mak ami deskobre mak sei fó sansaun. Sasán sira dada fila-fali depois ami sei fó fila ba grupu agrikultór sira-ne’ebé presiza,” nia dehan.
Administradór postu administradór Maliana, Augusto Caetano, husu ba grupu benifisiáriu sira atu utiliza tartór ne’e ho kuidadu, tanba Governu fó apoia ne’e dala ida de’it.
“Sasán ne’e imi-nian, labele hadau malu. Ninia kapasidade kiik, labele obriga ba fali halai natár. Halo ba ortikultura nian de’it no ami hein nia rezultadu,” nia hateten.
Entretantu, reprezentante grupu agrikultór husi suku Tapo-Memo, Eusebio dos Santos ‘Bei-Lino’, sente kontente no hato’o agradesimentu ba Governu tanba apoiu ne’e bele responde ona grupu agrikultór nia preokupasaun durante ne’e.
“Ida-ne’e mak buat ne’ebé durante ne’e ami hanoin hela. Ohin loron, Estádu bele fó ona ami, ha’u hanoin ami mós prontu hasa’e produsaun tanba agora Governu mós konstrui ona irrigasaun Maliana II, ho ida-ne’e ami sei esforsu,” nia dehan.
Antes ne’e, atividade distribuisaun Hand Tractor ne’e hala’o ona iha postu administrativu Cailaco no Atabae.
Notísia Relevante: Ministru Agrikultura orienta dirijente sira jere ekipamentu agríkola iha munisípiu
Jornalista : Sérgio da Cruz
Editór : Cancio Ximenes