FONGTIL: TL nia adezaun ba ASEAN fó oportunidade atu dezenvolve ekónomia rai-laran
DILI, 25 Juñu 2025 (TATOLI)—Diretór Ezekutivu Forum Organizasaun Naun Governamentál Timor-Leste (FONGTIL), Valentim da Costa Pinto, hateten adezaun Timor-Leste nian hanesan membru plenu ne’ebé sei ofisializa iha fulan-Outubru mai ne’e, fó oportunidade ba Timor-Leste atu halo dezenvolvimentu ba ekonomia rai-laran.
Notísia Relevante: PR Horta – PM Anwar diskute preparativu simeira ASEAN iha outubru
“Timor-Leste nia adezaun ba ASEAN ne’e hanesan oportunidade ba dezenvolvimentu ekonomia tanba ASEAN ne’e rasik plataforma ekónomia,” Valentim da Costa Pinto hateten ba Agência Tatoli iha Faról, kuarta ne’e.
Tuir Valentim, agora laiha ona oportunidade atu diskute kona-ba vantajen no dezvantajen Timor-Leste nia adezaun ba ASEAN, maibé tenke hanoin oinsá mak Governu tenke hakarak Timor-Leste nia investimentu sira oinsá konvida investor sira mai Timor-Leste.
Tanba ne’e, nia husu ba Governu atu tenke hanoin ona hodi dezeña karaterístika Orsamentu Jerál Estadu (OJE) tenke muda ona husi tendensia apoiu sosiál ba iha sesaun ekónomia nian.
“Governu tenke hanoin ona atu dezeiña OJE ida-ne’ebé muda ona tendensia apoiu sosiál sira tenke mai ona husi sesaun ekónomia nian. Orsamentu ne’e tenke iha karaterístika dezenvolvimentu. Tanba, ita iha ona hanoin atu kompete ba merkadu rejionál mak ita-nia interna tenke iha investimentu ne’ebé tenke halo atu hasa’e ita-nia produtu lokál sira-ne’ebé sai hanesan brand nasionál Timor-Leste nian, hodi ita bele ba kompete iha merkadu rejionál,” Valentim afirma.
Nia hatutan, adezaun ida-ne’e atu hatudu Governu tenke investe ona iha setór ekónomia nian oinsá atu halo barak sentru produsaun sira, setór privadu sira tenke iha kbiit naton atu halo investimentuhodi justifika Timor-Leste nia adezaun ho kualidade, nune’e bele iha oportunidade barak kompete ba merkadu rejionál.
“Ita tenke esforsu-aan para hamenus dezempregu, hasa’e produsaun. Ita-nia grupu agrikultór sira bele halo produsaun, setór privadu sira bele sai parseiru di’ak ba investór sira-ne’ebé mai husi nasaun membru ASEAN sira seluk,” nia dehan.
Aleinde ne’e, nia husu ba Governu atu hadi’a ona enkuadramentu legál sira ho polítika investimentu ne’ebé loos, atu sé de’it bele mai Timor-Leste tenke aliña ho polítika interna sira, tenke obdese ba lei sira-ne’ebé iha atu labele fó biban ba ema seluk hodi regula movimentu ekonomia rai-laran.
Notísia Relevante: PPN no PM koordena preparasaun lei sira ba adezaun plena Timor-Leste ba ASEAN
Jornalista : Hortencio Sanchez
Editór : Cancio Ximenes
