KOVALIMA, 30 Juñu 2025 (TATOLI) – Sekretariu Estadu Formasaun Profesionál no Empregu (SEFOPE), Munisípiu Kovalima rejista Kovalima-oan sira ne’ebé sai ona traballadór iha nasaun estranjeiru hamutuk na’in-1,255.
“Hahú 2012 to’o 2024 ne’e, ami rejista Kovalima-oan ne’ebé sai ona traballadór hodi ba servisu iha nasaun estranjeiru hanesan Austrália, Korea no Japaun hamutuk na’in-1,255”, Diretór SEFOPE Munisípiu Kovalima, Stefanos Segundu Manek relata dadus ne’e ba TATOLI, iha Tabakolot, ohin.
Husi dadus númeriku ne’e, tuir dirijente ne’e, Kovalima-oan ne’ebé sai traballadór iha Austrália hamutuk 854 no sira ne’ebé fila ona mai Timor-Leste hamutuk 539 no ativu serbisu iha Austrália hamutuk 315.
Iha Korea, Kovalima-oan hamutuk 399. Enkuantu, na’in hira mak fila ona SEFOPE seidauk ida dadus no serbisu iha Japaun na’in-rua.
Kovalima-oan rihun ida-resin ne’ebé serbisu iha estranjeiru maioria traballadór sira halo konstrusaun ba sira-nia rezidénsia no balun halo negósiu hanesan loke kioske hanesan iha aldeia Busa Kukun, suku Debos, restu nia rezultadu konstrui sira-nia rezidénsia.
“Ita hatene Kovalima-oan ne’ebé sai traballadór hodi ba serbisu iha estranjeiru nia rezultadu mak konstrui sira-nia rezidénsia no balun mak loke kioske ne’e de’it. Atividade seluk ita seidauk hatene tanba seidauk iha dadus”, nia dehan.
Notísia relevante:Kandidatu traballadór Austrália 234 tuir teste atu hetan númeru referénsia
Jornalista:Celestina Teles
Editór: Rafael Ximenes de A. Belo
